A Fiscalía Provincial de Pontevedra presentou unha demanda colectiva contra a empresa concesionaria da autoestrada AP-9, Audasa, por unha práctica "abusiva" que lle atribúe ao cobrar a peaxe da ponte de Rande coa tarifa ordinaria durante o tempo que duraron as obras de ampliación a pesar de que había restricións permanentes de tráfico e por tanto o servizo era deficiente. 

O fiscal de Consumo de Pontevedra, Alejandro Tuero González, presentou este luns ante o Xulgado do Mercantil unha demanda de xuízo ordinario en defensa dos consumidores e usuarios na que pide accións de nulidade, restitución de cantidades e indemnización de danos e prexuízos. 

Con esta demanda, a Fiscalía pide ao xulgado que dite unha sentenza que declare a nulidade da práctica de Audasa de cobrar integramente a peaxe da autoestrada en todo caso, sen moderar ou eliminar o seu importe cando non se está prestando o servizo en condicións suficientemente satisfactorias de fluidez e/ou seguridade do tráfico. 

A maiores, pide que se condene a Audasa a non volver usar esta práctica abusiva no futuro en calquera autoestrada que xestione en España. Para iso, ten un prazo dun mes para para remitir ao tribunal un criterio de eliminación do prezo da peaxe nos casos de insuficiente fluidez do tráfico. 

A condena incluiría reintegrar aos usuarios os importes das peaxes que foran abonados no tramo da contorna da ponte de Rande durante os tres anos que duraron as obras de ampliación de Rande, entre o 27 de febreiro de 2015 e o 1 de xuño de 2018, cos intereses legais desde a data do pago de cada peaxe. 

Unha sentenza condenatoria tamén implicaría que Audasa pagase unha indemnización consistente no dobre do importe da peaxe a todos os usuarios que non sexan profesionais da condución e/ou titulares de empresas de transporte de mercadorías ou pasaxeiros, no desempeño de tales ocupacións profesionais ou empresariais, que acrediten atoparse nun dos atascos apuntados, ou en calquera outro que implicase retencións superiores a dez minutos.  

A demanda recolle que durante polo menos tres anos as obras do tramo da AP-9 entre Cangas e a ligazón de Teis, incluído a ponte de Rande, afectaron "de forma relevante e constante" á fluidez do tráfico na autoestrada. O tráfico viuse "permanentemente afectado" no tramo da ponte de Rande pola redución do número de carrís en uso, a redución dos límites de velocidade e as sucesivas tarefas de execución das obras. 

Durante todo ese tempo, a fluidez da circulación diminuíu, sendo preciso empregar máis tempo do habitual para percorrer a mesma distancia de autoestrada e, por estas razóns, todos os vehículos que circularon nese tramo nesas datas víronse afectados, en canto recibiron un servizo da autoestrada con insuficientes condicións de fluidez e seguridade.

A demanda da Fiscalía engade que esas mesmas circunstancias favoreceron a aparición de embotellamentos e retencións, os cales se sucederon de forma constante e cotiá e, a pesar de todo, non só se mantivo o cobro íntegro da peaxe en todo momento, senón que a partir do día 1 de xaneiro de 2018 mesmo se incrementou. Destaca tamén que o 30 de decembro de 2017 inauguráronse as obras, permitindo ese incremento da peaxe e, con todo, continuaron traballando. 

A Fiscalía non coñece a totalidade de consumidores afectados pola práctica xeral abusiva, polo que solicita que a sentenza que derive desta demanda esténdase a todos os usuarios que se puidesen atopar na mesma situación. Durante eses tres anos houbo 77 millóns de tránsitos e a recadación por peaxes correspondente a vehículos lixeiros ascendeu a uns 90 millóns de euros.

A acción emprendida polo fiscal baséase en que o pago da peaxe ten o carácter de contraprestación porque se entrega a cambio de recibir unha prestación, que é o uso en perfectas condicións de fluidez, velocidade e seguridade dunha vía de alta capacidade, de modo que a práctica de Audasa foi "abusiva" en tanto que se esixiu a totalidade do importe da peaxe, é dicir, do pago do mesma peaxe que cando a autoestrada funciona de modo normal, "a pesar de ter completa constancia de que non se pode prestar o servizo en tales condicións".

Engade, ademais, que cando existe un atasco na autoestrada, o mantemento do cobro da peaxe supón un notable incremento do atraso xa acumulado, dada a necesidade de efectuar individualmente o cobro a todos os vehículos acumulados.