Retiran máis de 15 toneladas de residuos dos fondos mariños do porto do Grove
Por Redacción
Portos de Galicia e o centro de mergullo Palmira Scuba retiraron 15 toneladas de residuos sólidos dos fondos mariños do porto de O Corgo (O Grove). Segundo informa a Xunta nun comunicado, é a terceira das actuacións enmarcadas na fase inicial do programa de limpeza de dársenas de terceira e cuarta lista de titularidade autonómica.
Entre os residuos extraídos atopáronse diversos obxectos de medianas e grandes dimensións, entre eles, cadeas, madeiras e neumáticos, arroxados ao mar por particulares, así como unha videocámara e unha motocicleta.
Ademais, retiráronse materiais e restos da propia actividade portuaria que accidentalmente acaban no fondo do mar, como caixas de peixe ou cabos desprendidos de embarcacións atracadas no porto.
O presidente de Portos de Galicia, José Juan Durán, destacou a importancia deste tipo de actuacións de cara á seguridade nas augas interiores e avanzou que se está deseñando xa unha segunda fase de iniciativas. Ratificou tamén o beneficio que supoñen de cara á protección da fauna mariña, "que pode ser afectada seriamente pola acumulación de residuos nos fondos" e para garantir a sostenibilidade ambiental dos portos galegos.
Esta actividade é o resultado dun convenio de colaboración asinado por Portos de Galicia e o centro de mergullo Palmira Scuba para o desenvolvemento de catro experiencias piloto na ría de Arousa. Tralas iniciais, na Pobra do Caramiñal e Carril (Vilagarcía), e esta de O Grove, está previsto que se peche esta primeira fase no porto de Rianxo.