Convocados os propietarios de leiras afectadas para o pago de expropiacións en Marín, Poio e Sanxenxo
Por Redacción
A Xunta de Galicia publicou este luns o anuncio para convocar o próximo 20 de decembro os propietarios dos terreos afectados pola construción da senda peonil entre Vilaseca e Lapamán, en Marín. Nesa data a administración autonómica pagará os depósitos previos.
Os titulares dos terreos deberán achegarse ao edificio do Concello de Marín, nun horario entre as 10.20 e as 14.00 horas. O orzamento que manexa a Consellería de Infraestruturas é de máis de 740.000 euros e case 17.000 destínanse ás expropiacións.
Esta senda estará destinada para peóns e ciclistas non deportivos e acometerase na marxe dereita da estrada PO-551, entre o punto quilométrico 6+260 e o límite municipal na parroquia de Ardán co Concello de Bueu. O itinerario contará con 1.450 metros de lonxitude e proxectarase en formigón coloreado cun ancho, en xeral, de dous metros.
Tamén está prevista a creación dunha pasarela de madeira para saltar un regato. Ademais canalizaranse as augas de drenaxe. Na zona final do proxecto, preto da praia de Lapamán, instalarase unha banda de aparcadoiro en liña, paralelo á estrada, con ao redor de 35 prazas.
OBRAS DE SEGURIDADE NA PO-308
A Xunta tamén convocou os propietarios de leiras afectadas polas obras de mellora da seguridade viaria na estrada PO-308 para o pago de depósitos previos.
Os titulares da zona de Sanxenxo deberán achegarse ao Concello o día 18 de decembro, mentres que os de Poio están convocados para os días 18 e 19 de decembro na Casa Consistorial deste municipio.
A obra busca a mellora da seguridade entre o peirao de Covelo e o miradoiro da Granxa. Foi adxudicada por máis de 1,2 millóns de euros e os traballos céntranse na execución dunha semirotonda no acceso ao peirao e unha glorieta no cruce coa PO-303 en Samieira.
Relacionadas:
-
A senda peonil entre Vilaseca e Lapamán estará rematada no verán
Por Redacción |
-
COVSA inicia as obras da senda de Vilaseca a Lapaman
Por Redacción |
-
Covsa construirá a senda entre Vilaseca e Lapamán
Por Redacción |
-
Poio presenta doce alegacións ao proxecto autonómico para mellorar a seguridade viaria da PO-308
Por Diego Espiño |
-
O PP recolle suxestións para mellorar as sendas da PO-308
Por Oskar Viéitez |
-
Adxudican por 1,2 millóns de euros a mellora da seguridade viaria noutro tramo da PO-308
Por Redacción |
-
A veciñanza traslada as súas suxestións sobre a senda de Lapamán á conselleira Ethel Vázquez
Por Oskar Viéitez & Mónica Patxot |