Adxudicados provisionalmente 59 hortos en Monte Porreiro e Finca do Conde
Por Redacción
Dende este martes pódese consultar na páxina web municipal pontevedra.gal o resultado do sorteo das hortas urbanas celebrado a pasada semana nas instalacións de Medio Ambiente Natural, no edificio Churruchaos.
Das 71 solicitudes individuais recibidas, adxudicáronse 22 hortos en Monte Porreiro (todos os que saían a concurso) e 37 na Finca do Conde, quedando neste último caso unha lista de agarda de 11 persoas.
A partir da publicación destas listaxes, ábrese o prazo de alegacións que poderán facerse a través da sede electrónica ou ben presencialmente no rexistro xeral do Concello. O prazo para alegacións rematará o martes 25 de setembro.
Celebrarase unha reunión informativa á que deberán acudir todos os adxudicatarios no Centro Social Gorgullón, o venres 28 de setembro ás 20:30 horas.
Todos os adxudicatarios actuais deberán recoller as súas ferramentas, utensilios e produtos da horta antes do 15 de outubro, xa que dende esa data comezarán os traballos para mellorar os bancais.
O Concello de Pontevedra realizou durante os pasados meses un proceso de reformulación das hortas urbanas municipais para darlles unha articulación legal máis acaída e unificalas no departamento de Medio Ambiente, xa que, até o de agora, a Finca do Conde a xestionaba Igualdade.
A concesión será por dous anos prorrogables a outros dous e haberá unha obrigada carencia de dous anos antes de poder volver a iniciar o proceso de concesión.