Lucía César Veloso será a candidata do BNG de Vilagarcía nas municipais de 2019
Por Redacción
O BNG xa ten candidata para as próximas elección municipais en Vilagarcía de Arousa. Trátase de Lucía César Veloso, que foi elixida pola asemblea local do partido.
Nacida en Vilagarcía en 1984, é titulada en Maxisterio Musical e Pedagoxía, impartindo formación (nomeadamente musical) en varias asociacións culturais. Forma parte e colabora con diversos grupos no ámbito da música e cultura tradicionais, como a Asociación Cultural Malveiras e o Gato Negro de Carril.
Concelleira xa na actualidade, na asemblea destacáronse os seus méritos, capacidades e dedicación no presente período municipal, coincidindo na idoneidade do seu perfil para liderar a candidatura.
A nacionalista agradeceu o apoio unánime dos presentes na asemblea e afirmou coller con ilusión esta nova tarefa para traballar en equipo polo ben da veciñanza de Vilagarcía.
Lucía César Veloso entrou na corporación en substitución da anterior voceira municipal do BNG, María Villaronga, que deixara o seu cargo por motivos persoais.
Na actualidade, o BNG ten dous concelleiros na corporación municipal de Vilagarcía.