A calor destes días aumenta o grao alcólico das uvas e abre a porta a un adianto da vendima
Por Redacción
As previsións de temperaturas por encima dos 30 graos no inicio do mes de setembro provocaron que os técnicos da Estación Fitopatolóxica de Arreiro ( EFA), centro que depende da Deputación de Pontevedra, avancen a posibilidade dun adiantamento da data de vendima.
Segundo indican, as uvas están a aumentar o grao alcohólico e detéctase un cambio na cor dos acios das viñas das comarcas do Salnés, Soutomaior, O Rosal ou O Condado durante os últimos días.
Os técnicos alertan de que, aínda que os acios máis sensibles á botrite atópanse sans en xeral, é necesario manter a vixilancia porque está previsto que cheguen as precipitacións ao longo da vindeira semana co consecuente humedecemento dos viñedos. No caso de que sexa necesario aplicar un funxicida, a técnica Rosa Pérez sinala que se poden utilizar produtos biolóxicos.
Na comarca do Salnés, así como no Rosal, aumentaron as capturas de couzas do acio. O tratamento depende, segundo os especialistas, da sensibilidade da uva á botrite (3-5% de acios con penetracións nas viñas sensibles á botrite e 8% nas menos sensibles). Sinalan que se se aplicou un antibotrítico non deberían xurdir problemas. En caso contrario, aínda é posible tratar a couza con insecticidas biolóxicos, consultando previamente aos técnicos.