Pretende facer un 'simpa' de tres cervexas, ponse farruco coa Policía e acaba detido
Por Natalia Puga
Un home duns 50 anos rematou detido pola Policía Local de Pontevedra na tarde deste martes tras protagonizar un incidente que chamou a atención de todos os viandantes, veciños e comerciantes da rúa Marquesa. Intentou irse sen pagar dunha bocatería e cando os axentes lle chamaron a atención, rebotouse e tivo que ser reducido.
"Vinieron primero dos policías, pero al final había como seis, dos coches y dos motos", explica un cliente do local, a bocatería Sanchez. Tal despregamento de medios xerou tamén grande expectación na rúa.
O incidente produciuse sobre as 18.00 horas. Segundo relata o propietario do negocio, chegaron dous individuos que non son clientes habituais ("es la primera vez que los veía") e pediron dúas cervexas. Ao rematar a consumición, un deles quixo repetir e, cando chegou a hora de pagar, negouse a facelo.
Nese momento produciuse unha pequena desavinza entre o cliente e o propietario e este, para evitar incidentes maiores, solicitou a presenza no establecemento dunha patrulla da Policía Local que realizaba tarefas de seguridade cidadá pola zona.
Os axentes intentaron "razonar" co cliente en cuestión e "le preguntaron si tenía intención de pagar o no". O home dixo que non, pero, ademais, "empezó a decirle cállate, cállate" e "le plantó cara al policía".
O ambiente empezou a subir de ton e o enfrontamento rematou na rúa. O policía "se vio obligado a reducirlo con la porra porque no había forma de que se calmase", segundo relatan clientes do local.
Finalmente, detivérono entre os seis axentes da Policía Local que compareceron no lugar e trasladárono á Comisaría Provincial, en principio, por resistencia á autoridade.