Activan o nivel amarelo por temperaturas superiores a 35 graos nas Rías Baixas
Por Redacción
A Axencia Estatal de Meteoroloxía (Aemet) activou este luns o aviso de nivel amarelo nas Rías Baixas e en distintos puntos próximos ao río Miño no sur de Pontevedra e en Ourense por temperaturas máximas superiores aos 35 graos.
O aviso por nivel amarelo significa que non existe risco meteorolóxico para a poboación en xeral aínda que si para algunha actividade concreta e serve para chamar a atención sobre a subida das temperaturas, que afectarán sobre todo a partir das 14.00 horas deste luns e ata as 20.00 horas.
Segundo as previsións de Meteogalicia, durante a xornada deste luns as temperaturas máximas poderán alcanzar nas Rías Baixas aos 37 graos e as mínimas roldarán os 17.
Ao longo dos próximos días continuará a situación de ceos pouco nubrados ou despexados e temperaturas altas para as mínimas e moi altas para as máximas con respecto ao habitual, en especial durante as xornadas deste martes e este mércores. De feito, o martes espérase que os termómetros oscilen entre os 18 de mínima e os 35 de máxima e este mércores entre os 17 e os 33.
A partir do xoves, nas mínimas non haberá grandes cambios, pero si se espera que as máximas teñan un lixeiro descenso. Así, o xoves aínda se esperan 31 graos, pero para o venres xa se esperan máximas de tan só 23 e para o sábado de 24.
De fronte ao fin de semana e principios da semana próxima haberá certa inestabilidade atmosférica que podería dar lugar a que aumenten as nubes de evolución durante o fin de semana, pero a influencia anticiclónica irase recuperando nos seguintes días.