Os pontevedreses esperan unha media de 34,6 días para seren operados
Por Redacción
As demoras para cirurxía, consultas e probas diagnósticas dos hospitais da área sanitaria Pontevedra-O Salnés rexistradas no primeiro semestre do ano son, segundo o Servizo Galego de Saúde, as máis baixas de todo o sistema sanitario público galego.
Os datos oficiais que fixo públicos o Sergas recollen 34,6 días de demora media para unha intervención cirúrxica. É na actualidade 25,2 días inferior á media de todos os hospitais galegos, cuxo dato dispárase ata os 59,8 días. A espera redúcese nos casos máis graves, designados como Prioridade 1, ata os 9,3 días, un dato tamén inferior ao conxunto de Galicia.
En Pontevedra, os servizos cirúrxicos con menor tempo de espera medio son Cirurxía Xeral e Dixestiva (25,8 días) e Xinecoloxía (27,3 días). Por outra banda, as especialidades cirúrxicas con demoras máis elevadas son Traumatoloxía (41,6 días) e Dermatoloxía (39,4 días).
No caso do Salnés, son os servizos de Dermatoloxía (21,8 días) e Uroloxía (29 días) os que menor demora media rexistran, e as especialidades de Xinecoloxía (38,4) e Otorrinolaringoloxía (42,2) as que máis.
PRIMEIRAS CONSULTAS
En relación ao tempo de espera medio para unha primeira consulta nos centros da EOXI de Pontevedra e O Salnés, este sitúase nos 29,8 días, novamente unha cifra por debaixo da media galega, situada nos 37,3 días.
En Pontevedra, os servizos con menor espera media para unha primeira consulta de enfermidade son Obstetricia, Oncoloxía Médica, Endocrinoloxía, Medicina Interna e Cirurxía Xeral e Dixestiva, cun prazo inferior aos dez días. Pola contra, a única especialidade con maior demora, situada por riba dos 40 días, correspóndense ao servizo de Rehabilitación.
No Salnés, os servizos con menor tempo medio de demora para unha primeira consulta de enfermidade son Pediatría e Uroloxía, ambos por debaixo dos dez días, mentres que o servizo con maior demora é Neuroloxía, superando os 40 días de espera.
PROBAS DIAGNÓSTICAS
No tocante ás citas para as primeiras probas diagnósticas máis significativas, a espera media para o TAC na EOXI é de 31,6 días (no complexo hospitalario é de 27,3 días e no Salnés de 33,5 días), 27,5 días menos que a demora media do Sergas, situada en 59,1 días.
No caso da resonancia magnética, a demora media é de 40 días (40,9 días en Pontevedra e 37,7 días no Salnés). Así mesmo, a demora media respecto á ecocardiografía é de 31,8 días, para a mamografía de 29,3 días e para a radioloxía convencional de 9,4 días.
Con respecto á endoscopia dixestiva, a situación varía de forma sensible entre o Complexo Hospitalario Universitario de Pontevedra e o hospital do Salnés, pois no primeiro a demora é de 34,9 días e no segundo de 15,7 días.
VÍAS RÁPIDAS
Ademais, as vías rápidas de atención ao cancro de mama, colorrectal, de pulmón, de vexiga, de próstata, de otorrinolaringoloxía e melanoma, a través das cales foron atendidos 959 pacientes, mantiveron tempos de demora por debaixo do obxectivo do Sergas de 15 días, sendo a espera máis alta a relativa ao cancro colorrectal con 5,4 días de demora media.