Campolongo estreará o parque infantil "máis grande" de Pontevedra antes de final de ano
Por Alejandro Espiño
Unha área de case 1.000 metros cadrados, delimitada polo colexio Crespo Rivas, o complexo deportivo das piscinas e o paseo cuberto do Gafos. É o espazo que ocupará o futuro parque infantil de Campolongo que será, segundo destaca o goberno municipal, "o máis grande" de toda a cidade.
A empresa HPC Ibérica será quen execute a obra, que ten un custo de 272.515 euros. Ten un prazo de tres meses, polo que o Concello confía en que estea totalmente operativo a finais de ano, tendo en conta que durante o verán pode haber algún atraso coa entrega de materiais por parte das compañías provedoras do sector.
O novo parque infantil de Campolongo terá tres zonas diferenciadas.
A primeira delas, destinada a nenos menores de seis anos, estará equipada con bambáns básicos de berce e inclusivos, xogos combinados, un carrusel no que collerán cadeiras de rodas, un trampolín, un xogo de muelle con dous postos, dous teléfonos que permiten aos nenos situarse a unha distancia de ata 25 metros ou un sendeiro de texturas.
Unha torre de tobogáns de seis metros e medio de altura, de estética similar a un parque acuático, será o elemento central da zona pensada para os nenos máis maiores. Haberá nela tamén zonas para trepar, bambáns planos e de cesta ou mesmo unha tirolina.
Entre ambas áreas haberá unha zona pensada para a espera dos acompañantes dos nenos, na que haberá bancos, mesas e unha fonte. Ademais, haberá unha mesa para poder xogar ao tenis de mesa e outras dúas con xogos fixos de parchís e xadrez.
As obras comezarán co tratamento de toda a parcela na que se vai a actuar, na que haberá que formigonar para facer a base do parque, botar caucho e, finalmente, herba sintética. Todo este parque estará integrado no entorno e respectaranse as árbores existentes.
Relacionadas:
-
O parque infantil de Campolongo é de premio
Por Redacción |
-
O Concello afrontará unha remodelación integral do parque de Campolongo
Por Alejandro Espiño & Mónica Patxot |
-
Unha gran festa inaugurará o venres o novo parque infantil de Campolongo
Por Alejandro Espiño |
-
O novo parque infantil de Campolongo estará rematado nun mes
Por Alejandro Espiño & Mónica Patxot |
-
Cidadáns reclama unha revisión exhaustiva dos parques infantís
Por Oskar Viéitez |
-
A creación do novo parque infantil de Campolongo interesa a trece empresas
Por Redacción |
-
Licitan por 300.000 euros a construción do parque infantil de Campolongo
Por Alejandro Espiño |