Todos os partidos políticos únense na Deputación en defensa dos informativos locais da Radio Galega
Por Natalia Puga
Todos os partidos políticos con representación na Deputación de Pontevedra (PSOE, BNG, PP e Marea-SON) apoiaron este venres unha declaración institucional en apoio do mantemento dos informativos locais da Radio Galega e en contra da decisión da Compañía de Radio Televisión de Galicia (CRTVG) de suprimir as desconexións locais na nova programación que acaba de poñerse en marcha.
Durante o pleno da Deputación celebrado este venres a presidenta provincial, Carmela Silva, leu a declaración pola que o organismo se suma á reclamación que están a facer desde hai semanas os traballadores da radio pública en defensa deste servizo. Ao remate, todos os partidos apoiaron a proposta de forma unánime.
A pesar de que a nivel local o PP de Pontevedra rexeitou no pleno apoiar unha iniciativa que tiña o mesmo obxectivo, o partido a nivel provincial si que se sumou á reivindicación, que defende que eliminar os locais é suprimir unha das funcións para as que foron creadas as delegacións da Radio Galega e renunciar a ser un referente para os oíntes, que acabarán escollendo outras emisoras para saber o que pasa na súa contorna.
A declaración institucional aprobada supón pedirlle á dirección da Radio Galega que "recapacite e reconsidere a súa decisión" e mesmo vai máis alá e engade que "o máis apropiado" sería reforzar as delegacións da radio pública, que na actualidade están mermadas de persoal e sen técnicos de son, requisitos fundamentais para ofrecer unha información próxima ós cidadáns coa máxima calidade posible.
Os partidos políticos consideran un "erro" a decisión e defenden os informativos locais asegurando que hai persoas que buscan e atopan nas desconexións locais as noticias que lles son máis próximas, as voces dos actores máis cercanos á súa realidade e que se trata habitualmente dunha información que polas súas características non ten fácil acomodo noutros espazos informativos dirixidos a ámbitos de poboación máis xenéricos.
A decisión da CRTVG pasa por salpicar o conxunto da programación con doses informativas do que pasa en ámbitos máis locais e a Deputación aplaude esa iniciativa, pero considera que "de ningunha maneira" pode substituír un espazo de referencia onde os oíntes de cada vila e cidade teñen a certeza de que lles van ofrecer as noticias que buscan.
O pleno da corporación tamén aprobou por unanimidade unha moción de Marea-SON para pedir o cese do deterioro do servicio de Correos na provincia e a falta de persoal no municipio de Vigo e a súa comarca, así como contra os recortes en financiamento.
Relacionadas:
-
O retorno da sede da RTVG á cidade figura na axenda do alcalde
Por Oskar Viéitez |
-
O PP de Pontevedra rexeita os informativos locais na programación da Radio Galega
Por Mónica Patxot & Anxo Lourido |
-
O BNG solicita que a delegación da radio e televisión galega volva a Pontevedra
Por Oskar Viéitez |
-
Instan á Xunta a que reabra a delegación da CRTVG en Pontevedra
Por Redacción |