Un concurso de fotografía para enxalzar a riqueza natural e paisaxística de Galicia
Por Redacción
Baixo o lema "Pon o teu obxectivo na natureza", e no marco do Día Mundial do Medio Ambiente que se celebrará este 5 de xuño, Sogama, co apoio da marca Galicia Calidade, convoca un concurso de fotografía ambiental a través do cal pretende enxalzar a beleza natural e paisaxística da nosa comunidade.
Os interesados en participar dispoñen de prazo ata o 22 de xuño para enviar á entidade as súas mellores instantáneas, que deben ser canalizadas a través dun formulario específico habilitado no sitio web www.sogama.gal, no que deixarán constancia dos seus datos persoais e outros tales como o lugar no que se realizou a fotografía, título da mesma, mensaxe a transmitir, etc.
A designación dos premiados efectuarase por sorteo, que terá lugar na propia sede da Sociedade Galega do Medio Ambiente en Cerceda (A Coruña) e ante unha comisión designada aos efectos, estando conformada por un presidente, un secretario e dous vogais, todos eles membros da entidade.
O certame contempla tres galardóns, cedidos pola marca Galicia Calidade. O primeiro consiste nunha noite para dúas persoas no Hotel Nanín Praia Sanxenxo, incluíndo aloxamento e almorzo. O segundo, un xamón Torre de Núñez, e, o terceiro, un lote de produtos certificados por Galicia Calidade (viño e conservas).
A compañía publicará na súa páxina web, así como nas súas redes sociais en Facebook e Twitter "Por unha Galicia sostible, educación ambiental Sogama", a resolución do concurso, poñéndose en contacto cos agraciados a través dos medios facilitados por estes.
A entrega dos premios será realizada directamente por Galicia Calidade.
Relacionadas:
-
Medio Ambiente sinala que Sogama situarase en 2019 á cabeza das infraestruturas industriais de tratamento de residuos
Por Noticia patrocinada |
-
"Comer si, tirar non", nova campaña de Sogama para facer fronte ao desperdicio alimentario
Por Redacción |
-
Escolares do CEIP de Lourido e o SEK visitan as instalacións de Sogama
Por Redacción |
-
Os alumnos da Escola de Enxeñería Forestal coñecen o proxecto de ampliación de Sogama
Por Redacción |