17 proxectos de arquitectura efémera concorren ao concurso de Experimenta Pontevedra
Por Redacción
Crear na cidade un espazo de reflexión a través de instalacións efémeras é un dos obxectivos de Experimenta Pontevedra, o novo Festival de Deseño Urbano que se vai a desenvolver do 21 ao 24 de xuño na Boa Vila promovida pola Concellería de Promoción da Cidade.
Catro instalacións creadas para tal ocasión convidarán á interacción da poboación e a posta en valor dos espazos públicos.
O concurso está en marcha. O próximo venres 1 de xuño reunirase o xurado que terá que elixir o proxecto gañador de entre 17 presentados. O xurado, presidido pola concelleira de Promoción da Cidade, Anabel Gulías, está integrado por un arquitecto municipal, un representante do estudo de arquitectura Carlos Ferro, outro do Colexio Oficial de Arquitectos de Galicia, a decana da Facultade de Belas Artes de Pontevedra e os comisarios deste Festival de Deseño Urbano: Javier Peña, José Santos e José Carlos Mera.
O proxecto elixido polo xurado instalarase na praza de Ourense tocando coa rúa Benito Corbal.
As outras tres propostas creadas ao abeiro de Experimenta Pontevedra están en proceso de creación: a encargada a un despacho de arquitrectura-urbanismo local está en mans de Xoán Anleu e poderá ver na praza de Santa María; a encargada a un equipo de ámbito estatal está en mans de CUAC Arquitectura, un estudo de Granada e poderase ver fronte ao Mercado e a encargada a un equipo internacional, nesta primeira edición de Portugal, está en proceso da man do despacho de Diogo Aguiar de Oporto e instalarase na praza do Hospital.
Experimenta Pontevedra nace para visibilizar a transformación urbana vivida nos últimos 15 anos, promover a difusión da imaxe do modelo Pontevedra e intervir no espazo público cunha instalación efémera que convide ao diálogo e á reflexión.
Relacionadas:
-
Unha primeira edición do Festival Experimenta 'de premio'
Por Redacción |
-
Os arquitectos reflexionarán na Illa de Ons sobre a destrución do hábitat
Por Oskar Viéitez |
-
As prazas de Pontevedra acollen ata o domingo un festival de deseño urbano
Por Oskar Viéitez |
-
Un proxecto efémero permitirá que a praza de Ourense viva un "día de praia"
Por Redacción |
-
Pontevedra, sede dunha bienal que ve "esencial" implicar os nenos no deseño do espazo común
Por Alejandro Espiño |
-
A arte arquitectónica destacarase en Pontevedra da man de Proxecto Experimenta
Por David Arana & Paula Sanmartín |