O "campanu" do Lérez cae no coto de Bora
Por Ramiro Espiño
O cobizado "campanu" do río Lérez caeu en Pontevedra ao redor das 14:30 horas no coto de Bora, concretamente no coñecido como "pozo de Sadornil". O afortunado pescador foi todo un veterano como José Manuel Maquieira.
O exemplar mediu 75 centímetros, dando en báscula un peso de 4,500 quilos, e foi obtido utilizando un cebo de camarón.
Coa emoción aínda reflectida na súa voz, José Manuel Maquieira expresaba a súa satisfacción a PontevedraViva, xa que, a pesar de conseguir antes outros exemplares, nunca lograra ese primeiro salmón da tempada.
Descartada a venda, non permitida en Galicia, o "campanu" será obxecto de degustación no ámbito familiar dos Maquieira, como nos dicía José Manuel "lo celebraremos en memoria de mi padre, fallecido este año".