A Garda Civil de Pontevedra logrou deter este luns o condutor do vehículo que na noite do sábado protagonizou unha rechamante fuga da Garda Civil levando 25 quilos de ameixa froito de furtivismo.

Xa na noite do sábado a patrulla da Garda Civil logrou interceptar os dous ocupantes do vehículo e identificar tamén o condutor, pero este lograra escapar a pé. Finalmente, foi arrestado este luns no poboado do Vao, en Poio. 

O detido é  R.G.T., un veciño do barrio pontevedrés de Monte Porreiro de 39 anos que conta con antecedentes policiais por roubo, tráfico de drogas e delitos de danos. Nesta ocasión, atribúenselle un delito de atentado a axente da autoridade e outro contra a seguridade viaria por condución temeraria, así como unha infracción por furtivismo.

O home foi arrestado e, tras prestar declaración na Comandancia da Garda Civil de Pontevedra, quedou en liberdade, pero en calidade de investigado e coa obrigación de acudir no Xulgado de Instrución número 1 de Pontevedra cando sexa requirido.

A fuga pola que foi arrestado ocorreu sobre as 23.50 horas do sábado, cando unha patrulla do servizo fiscal e de fronteiras da Garda Civil de Marín que se atopaba na zona de Lourido, en Poio, e observou o vehículo conducido polo agora detido. Pareceulles sospeitoso e déronlle o alto, pero o coche escapou, empezando unha fuga. 

A Garda Civil deulle sinais acústicos e luminosos para pedirlle que se detivesen, pero o condutor desatendeuna. Ademais, nun momento dado, realizou un movemento brusco e impactou contra o coche oficial, botándoo da calzada. A persecución terminou porque ao vehículo que se fuxía rebentáronlle dous pneumáticos e viuse obrigado a deterse. 

O condutor e os dous ocupantes seguiron a fuga a pé, pero os axentes lograron alcanzar a dous dos individuos xa nese momento. Ademais, realizaron un rexistro no vehículo co que se fuxiron e atoparon 25 quilos de ameixa extraída ilegalmente, de modo que se lle atribúe unha infracción por furtivismo.