Cambados amosará a súa oposición á sentenza xudicial polo caso da Manada cunha aperta á Naiciña
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/fb6/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/5ae4a6c5b7-a-naicina.jpg)
© Mulleres de Cambados
O colectivo A Naiciña de Cambados organizou para este domingo 29 de abril ás 20.00 horas unha concentración para manifestar a súa oposición á sentenza do tribunal da Audiencia de Navarra no caso da Manada. Este colectivo de mulleres considera o fallo inxusto e cualifica á xustiza española como "patriarcal".
Por este motivo, o colectivo decidiu concentrarse ao entender que o medo non pode someter ás mulleres e provocar que se cuestionen a súa liberdade. "Nin cinco nin un home ten dereito a decidir sobre nós. Non é non", sinalan desde esta agrupación.
Fan unha invitación a que todas as persoas do municipio se acheguen ata a praza de Asorey fronte á escultura da Naiciña, emblema cambadés da muller galega.
Durante este acto está previsto que se lea un manifesto e vestirase á imaxe da Naiciña co lazo violeta, símbolo da loita das mulleres. Ademais está previsto dar unha aperta colectiva á figura.
Tamén se anima aos asistentes para levar material reivindicativo como pancartas, globos, debuxos e demais obxectos que expresen os sentimentos ante esta sentenza xudicial.