Veciños de Médico Ballina saen á rúa para pedir un parque: "Nos hemos hartado de que nos humillen y nos engañen"
Por Natalia Puga
Un grupo de veciños da rúa Médico Ballina de Lérez volveu a saír á rúa este sábado para demandar a instalación dun parque infantil na zona e denunciar que senten "discriminados" por parte do Concello de Pontevedra, pois non teñen noticias de cando se executará a instalación que levan demandando desde o outono do ano 2014.
Os veciños convocaron unha concentración ao mediodía na rúa e encheron de pancartas a parcela na que está prevista a construción do parque, un terreo cedido polo Administrador de Infraestruturas Ferroviarias (Adif) ao Concello en marzo de 2016 e no que a administración local leva anos proxectando esta instalación.
As familias que secundaron a concentración lembran que este parque leva anos comprometido por parte do Concello e "non se están cumprindo os prazos acordados", de modo que xa urxen a súa construción. "Señor alcalde, necesitamos un parque", reza unha das pancartas instaladas.
"A ver si el ayuntamiento se entera de que aquí hay 90 o 100 niños que no tienen dónde jugar"
Un dos veciños que convocaron a protesta, Manuel Vila, explica que "nos hemos hartado de que nos humillen, nos mientan y nos engañen", por iso é polo que optaron por saír á rúa, como xa fixeron o verán pasado, para reiterar as súas demandas. A partir de agora dará un prazo dun mes ao Concello para que lles dalgunha novidade respecto diso e, no caso de que non teñan noticias, acometerán novas accións de protesta.
Os veciños lembran que os nenos deste barrio da parroquia de Lérez pegado á cidade de Pontevedra non teñen onde xogar e ven obrigados a utilizar as beirarrúas, co correspondente perigo, mentres que noutros puntos do centro si hai fondos para crear novos parques ou reformar os actuais.
"Nos sentimos engañados y humillados", indica Manuel Vila, que se fai eco dos veciños de toda a rúa e, en particular das familias con nenos ao pedir á administración local: "A ver si el ayuntamiento se entera de que aquí hay 90 o 100 niños que no tienen dónde jugar".
Relacionadas:
-
O parque de Médico Ballina, "na parrilla de saída": prevén comezar as obras a finais de ano
Por Alejandro Espiño |
-
Varios colectivos unen as súas voces para "facerse oír" ante o goberno municipal
Por Alejandro Espiño & Cristina Saiz |
-
Os populares urxen o parque infantil de Médico Ballina prometido
Por Oskar Viéitez |
-
O PP esixe ao goberno de Fernández Lores que fixe prazos para o parque infantil de Médico Ballina
Por Redacción |
-
Fartos de agardar por un parque infantil en Médico Ballina
Por Anxo Lourido |
-
Campolongo e Médico Ballina completarán a rede de parques infantís de Pontevedra
Por Alejandro Espiño |
-
O parque infantil de Médico Ballina, pendente dun trámite do ADIF
Por Redacción |
-
Os veciños de Médico Ballina reclaman con pancartas un parque infantil na zona
Por Redacción |
-
Protesta infantil en Médico Ballina: quero un columpio
Por Natalia Puga |