A Deputación fai entrega na Lama do primeiro premio do programa "Tecendo lazos"
Por Redacción
A deputada de Cohesión Social e Xuventude, Digna Rivas, xunto ao alcalde da Lama, Jorge Canda, fixo entrega do primeiro premio do programa "Tecendo Lazos" centrado na "Historia do meu concello" e posto en marcha por vez primeira o pasado ano.
As persoas gañadoras deste primeiro premio, un grupo de 15 persoas con idades comprendidas entre os 4 e os 66 anos, elaboraron un documento baseado nas lendas e historias dos muíños da Lama.
Digna Rivas destacou a necesidade de poñer en marcha o programa "Tecendo Lazos" para "aprender uns doutros xa que nestes momentos os avós e avoas teñen máis obrigacións que devocións, con pouco tempo de lecer para estar cos rapaces e rapazas, aprender xuntos e intercambiar experiencias".
Ao respecto, a deputada provincial subliñou que "Tecendo Lazos responde a esta necesidade, a de aprender xuntos, pero tamén para intercambiar experiencias, coñecer as historias e tradicións da vila que, en moitas ocasións, as máis mozas e mozos descoñecen".
A través deste premio, no que participaron as máis de 540 persoas que acudiron aos obradoiros do programa da institución provincial, pretendíase recompilar relatos e historias dos concellos da provincia nos que se desenvolveron actividades de "Tecendo lazos" e galardoar á máis orixinal e innovadora.
Deste xeito, o xurado do primeiro premio decidiu por unanimidade destinar o premio ás persoas participantes no obradoiro de "Bailes de Romaría" do Concello da Lama pola súa obra "Os muíños da Lama". Todos eles recibirán un lote de produtos de SmartPeme así como a publicación do traballo.
O traballo gañador, elaborado por 15 persoas de diferentes xeracións das mesmas familias con idades comprendidas entre os 4 e os 66 anos, afonda de xeito novidoso e rigoroso nas lendas e contos relacionadas cos muíños do concello da Lama pero, como valor engadido, inclúe o valor etnolóxico dos mesmos.