Contratan por 178.000 euros a instalación de 18 novos centros de compostaxe
Por Alejandro Espiño
Un acordo marco que permitirá a instalación de novos centros comunitarios de compostaxe nos puntos, tanto no ámbito urbano como rural, onde haxa demanda veciñal. É o contrato municipal que vén de adxudicarse a empresa Naturgalia.
O portavoz do goberno municipal, Raimundo González, explicou que esta compañía presentou a oferta máis beneficiosa, cun 4,35% menos do prezo de licitación e o compromiso de reducir o tempo de instalación das bases de 15 días a 8. Ofreceu 178.137 euros.
Estas son instalacións que se colocarán a demanda en distintos puntos do concello aínda por decidir. En principio, este acordo marco está pensado para instalar arredor de 18 centros de compostaxe.
Naturgalia será, ademais, a empresa que se encargará da adecuación da Xunqueira de Alba, obras nas que o Concello investirá 184.735 euros.
As obras que están proxectadas son a reconstrución das pasarelas e miradoiros de madeira existentes, a rehabilitación do paseo principal de acceso á Xunqueira de Alba, incluíndo a limpeza de sumidoiros e recuperación de bordos de pedra., a demolición de estruturas da antiga ponte ou o mantemento de mobiliario urbano, bancos e fontes.
Ademais, acometerase a reparación da varanda metálica na ponte sobre o río Rons, a limpeza do elemento principal de desaugadoiro do paseo que leva ata o parque da Deputación, a reparación do miradoiro grande da Xunqueira, a reparación, limpeza e pintado da varanda metálica e dos murais exteriores e a reparación da caseta de observación de aves.
A Xunta de Goberno tamén renovou o convenio de 210.000 euros coa Fanpa para a realización de actividades e o mantemento dos comedores escolares nos colexios de infantil e primaria; e aprobou a liña de subvención para as entidades sen ánimo de lucro que realizan labores no eido da cultura durante o ano 2018. A contía global destas axudas é de 30.000 euros.
Relacionadas:
-
A mellora integral da Xunqueira de Alba comezará en dúas semanas
Por Alejandro Espiño |
-
Ana Pontón ve o plan de compostaxe de Pontevedra como unha "referencia" internacional
Por Alejandro Espiño & Mónica Patxot |
-
Moreira critica que se estean "desperdigando" pola cidade "miniplantas" de compostaxe
Por Alejandro Espiño |
-
A protesta contra os novos composteiros que quedou diluída
Por Clara Alonso & Sara López Lago & Anxo Lourido |
-
O goberno local confía en que os veciños "de boa fe" vexan como os composteiros non causan molestias
Por Anxo Lourido |
-
Impulsan unha actuación "integral" na Xunqueira do Vao para mellorar o seu estado
Por Alejandro Espiño |