Unha pequena praza no cruzamento con Benito Corbal completará a reforma de Lepanto
Por Alejandro Espiño
Xa se coñecen todos os detalles da reforma urbana que o goberno municipal exporá para a rúa Lepanto pero, iso si, os veciños terán a última palabra.
Será unha actuación "integral", segundo explicou o concelleiro de Obras, Demetrio Gómez. Cumprirá con "todos os parámetros de calidade" do modelo urbano de Pontevedra. A rúa pasará a ser, destacou, un espazo "accesible para todos".
Lepanto, como xa se anunciou, pasará a ser un viario de plataforma única. O pavimento que se propón é lastro confinado en bandas de formigón, a mesma solución estética que o tramo peonalizado en Benito Corbal. Así, segundo o edil do BNG, "facilítase" o seu mantemento posterior.
A rúa, que terá o paso restrinxido a residentes e servizos, manterá ademais o seu sentido de circulación de San Antoniño a Benito Corbal, pero quedará sen aparcadoiros.
A actuación prevista inclúe, no tramo máis próximo a Benito Corbal, a creación dunha pequena praza que aproveitará o espazo existente á beira da antiga delegación da Xunta de Galicia, que xa se atopa en plena rehabilitación.
Para esta praza, o Concello propón dúas opcións para que os veciños escollan a que máis lles guste. Por unha banda, exponse a instalación de cinco bancos de cor granate para crear unha zona de estancia separada do paso dos vehículos ou, pola contra, desprazar as liñas do pavimento, colocar só tres bancos e plantar varias árbores, deixando un paso máis angosto.
Ademais, aproveitando esta reforma tamén se renovarán todos os servizos de saneamento, augas pluviais e fecais e abastecemento. Manterase a iluminación da rúa, que xa conta con tecnoloxía LED, aínda que se poderán engadir novos puntos de luz na praza de nova creación.
O Concello destinará uns 254.000 euros a esta obra, a expensas das achegas e suxestións que poidan realizar os veciños e comerciantes da zona.
Relacionadas:
-
2019 comezará con obras en Lepanto: a súa reforma integral, en marcha
Por Alejandro Espiño |
-
A reforma do último tramo de Benito Corbal interesa a 22 empresas
Por Alejandro Espiño |
-
As obras de reforma de Lepanto comezarán antes de que remate o ano
Por Alejandro Espiño |
-
Lepanto terá plataforma única e tráfico limitado a residentes e servizos
Por Alejandro Espiño |
-
Benito Corbal terá beirarrúas máis anchas e menos aparcamentos libres
Por Alejandro Espiño |
-
Moreira reúnese cos veciños de Lepanto e reclama orzamento para a reforma integral da rúa en 2018
Por Redacción |
-
Os veciños de Lepanto dan un voto de confianza ao Concello, que terá un anteproxecto antes do 21 de marzo
Por Natalia Puga & Mónica Patxot |