A "resaca emocional" de Carmela Silva polo 8 de marzo: "Nada pode volver a ser igual"
Por Oskar Viéitez
A presidenta da Deputación de Pontevedra, Carmela Silva, compareceu este venres en rolda de prensa cunha "resaca emocional", segundo ela mesma dixo, logo do vivido coa folga feminista do 8 de marzo, unha data na que "as mulleres demostraron que cando están xuntas non hai quen as pare".
A presidenta provincial asegurou que "hoxe a vida continúa e xa non estamos en folga, pero desde o goberno desta institución seguimos moi activas e activos reclamando a Igualdade".
Carmela Silva felicitou ás pontevedresas "polo seu poder" e lembrou que "este é un éxito exclusivamente das mulleres" que "marcará un antes e un despois na loita pola igualdade".
Silva amosou a súa satisfacción porque "non houbo un só concello na provincia de Pontevedra no que non houbera concentracións de mulleres", e insistiu en que "ningún cargo político, sexa da cor que sexa, debería intentar que ese éxito fora seu, porque non é certo".
A presidenta da Deputación de Pontevedra valorou especialmente o paro das mulleres xornalistas "porque se fixeron visibles, tiveron unha presenza propia que me provocou unha grande emoción ao velas e por iso lles dou os meus parabéns a todas".
Por estas razóns Carmela Silva cre que "onte comezou algo que vai durar durante moito tempo e que obrigará a que todas as administracións aproben leis que rachen dunha vez por todas coas discriminacións que padecemos as mulleres".
Relacionadas:
-
Concentración de delegadas da CIG coa vista posta na folga das mulleres do 8 de marzo
Por Redacción |
-
E Pontevedra volveu saír á rúa para defender o feminismo
Por Diego Espiño |
-
O xornalismo de Pontevedra, sen voces femininas no 8 de marzo
Por Alejandro Espiño |
-
Mobilización histórica das mulleres pontevedresas
Por Oskar Viéitez & Alejandro Espiño | Creada e actualizada