Europa recoñecerá a IXP Ribeiras do Morrazo en cuestión de días
Por Redacción
O Diario Oficial da Unión Europea publicará nos vindeiros días o regulamento polo que se aproba de xeito definitivo a protección da Indicación Xeográfica Protexida (IXP) 'Ribeiras do Morrazo', que afecta ao viño producido en terreos de Bueu, Marín, Poio, Pontevedra, Vilaboa, Cangas, Moaña e Redondela. O trámite é xa o último que faltaba e permite finalizar un proceso que comezou no ano 2014.
A información facilitoulla a conselleira do Medio Rural, Ángeles Vázquez, a representantes da IXP durante unha reunión celebrada este martes, segundo informou a Xunta de Galicia a través dun comunicado.
Ángeles Vázquez explicou aos adegueiros que a Comisión Europea procederá ao rexistro de 'Ribeiras do Morrazo' como nova indicación xeográfica protexida logo de superar o exame realizado, e tras ser publicada a solicitude de rexistro o pasado 5 de agosto de 2017 no DOUE sen que se producise ningunha oposición.
A conselleira agradeceu todo o traballo e esforzo que lle supuxo ao sector consolidar o seu produto e lembrou que Medio Rural xa activou en marzo a protección nacional transitoria, que fixo posible que os viños da colleita deste ano 2017 poidan contar xa coa etiqueta da IXP.
Os viños desta indicación xeográfica protexida son brancos e tintos con aromas francos nos que se aprecian as características propias da materia prima da que proceden, con gradacións alcohólicas moderadas, aromas florais e de froitas e cunha boa e equilibrada acidez.
A superficie potencialmente produtora de uvas para a IXP Ribeiras do Morrazo estaría entre 1.000 e 1.500 hectáreas. A uva albariña e a variedade máis representativa e para a súa elaboración son admisibles as variedades brancas caíño branco, godello, loureira, treixadura, branco lexítimo e torrontés. No caso das tintas, admítense brancellao, caíño tinto, pedral, espadeiro, loureiro tinto, mencía e sousón.
Segundo o rexistro vitícola de Galicia, nesta zona hai 25.414 viticultores, que contan con algo máis de 73.000 parcelas de viñedo. Actualmente hai sete adegas.
Relacionadas:
-
Que hai nesta botella? Unha campaña para aumentar as adegas da IXP Ribeiras do Morrazo
Por Redacción | Creada e actualizada
-
A Deputación impulsa a profesionalización dos viticultores na IXP Ribeiras do Morrazo
Por Oskar Viéitez & Mónica Patxot |
-
Poñen no mercado as primeiras botellas certificadas co selo Ribeiras do Morrazo
Por Oskar Viéitez |
-
Catro adegas comercializarán viño da IXP Ribeiras do Morrazo
Por Alejandro Espiño |
-
Un túnel para beber o país
Por Diego Torrado |
-
A Xunta autoriza a comercialización do viño da IXP Ribeiras do Morrazo no mercado español
Por Redacción |
-
O BNG esixe á UE que recoñeza "de inmediato" o viño Ribeiras do Morrazo
Por Alejandro Espiño |
-
Queda recoñecida en España a indicación xeográfica protexida de viños "Ribeiras do Morrazo"
Por Redacción |