O orzamento municipal de 2018 péchase en 75 millóns
Por Alejandro Espiño
Pontevedra terá en 2018 un orzamento que, finalmente, rozará os 75,2 millóns de euros. Trátase dun notable aumento do 3,13% con respecto ao anterior, ao crecer máis de 2 millóns de euros. O goberno municipal dará o visto bo a estas contas o vindeiro luns e a súa aprobación producirase nun pleno que se celebrará no prazo dunhas dúas semanas.
Como principais novidades, destaca o goberno, ademais de incluír 1,2 millóns adicionais para os proxectos que se executarán con fondos europeos, aparecen 1,8 millóns para novas dotacións do parque de bombeiros, unha partida específica para o barrio de Mollavao ou a nova consignación para o servizo de axuda domiciliaria.
Na memoria que acompaña a este documento, o alcalde de Pontevedra destaca que o orzamento para 2018 recolle "menor débeda, máis investimento real e máis diñeiro para o rural", as tres ideas sobre as que se elaboraron as contas.
Miguel Anxo Fernández Lores engade que foi un orzamento "participado", que recolle as achegas das federacións de veciños, entidades sociais e partidos políticos, especialmente de Marea e do PSdeG-PSOE, que permitirán coa súa abstención -ou o voto a favor no caso da primeira- que sexa aprobado no pleno da corporación.
En materia de ingresos. Fernández Lores destaca que, un ano máis, conxeláronse os impostos e taxas. Así, 27,6 millóns procederán de impostos directos e 20,7 millóns de taxas polo uso de servizos públicos. As multas, pola súa banda, achegarán 1,3 millóns. Ademais, a débeda pública caerá por baixo dos 20 millóns, un 20,75% menos.
Crece, pola súa banda, os gastos en persoal ata os 22,1 millóns e os gastos correntes, que ascenden a 31,7 millóns. Ademais, o alcalde destaca os 820.000 euros que se destinarán a un plan formativo de emprego ou o aumento do 42% da partida destinada a eventos deportivos e promocionais da cidade.
Pontevedra reducirá a contía dos créditos en 2018 e tamén dos intereses que paga e, segundo recolle a memoria do orzamento, crecerán un 14% as transferencias correntes -entre elas Pazo da Cultura e Turismo de Pontevedra- e as subvencións a entidades sociais. Neste punto inclúense, entre outros, os 425.000 euros da renda social.
O alcalde contrapón o ritmo "moi pausado" de actuacións do Estado coa "revitalizada" colaboración coa Xunta
Con respecto aos investimentos, Lores repasa o destino dos 12,7 millóns de euros consignados. Máis aló da ponte do Burgo, o multiusos da Xunqueira ou o Gorgullón, que se reformarán con fondos europeos, aumentan as partidas para abastecemento de auga, iluminación e seguridade viaria nas parroquias do rural.
Haberá diñeiro tamén para a reforma urbana de Loureiro Crespo, novas casas de cultura, o local municipal da rúa dos Ferreiros, as expropiacións do novo acceso a Monte Porreiro, a adquisición de composteiros ou unha nova edición do plan forestal Monte Vivo.
OUTRAS ADMINISTRACIÓNS
A memoria da Alcaldía contrapón, por outra banda, o ritmo "moi pausado" de actuacións do Estado como o paseo a Marín ou a reforma do nó de Bombeiros coa "revitalizada" colaboración coa Xunta, que se materializará na variante de Alba, o Gran Montecelo, os novos xulgados da Parda, a reforma de Benito Corbal ou un pavillón de ximnasia.
Coa Deputación celebra que se manteña a dinámica "moi positiva" que, en 2018, permitirá financiar novas infraestruturas deportivas, o acceso a Monte Porreiro por Tafisa, a nova entrada a Príncipe Felipe, o saneamento do río Gafos, a Rolda Leste, a mellora de estradas no rural ou o plan de compostaxe.
Todo iso contribuirá, resume o alcalde, a "seguir consolidando" a marca Pontevedra, contribuír ao "progreso socioeconómico" da cidade, a priorizar as políticas sociais que melloren a calidade de vida dos cidadáns e a afrontar dous "grandes retos": o avance da compostaxe e a rehabilitación da "histórica" ponte do Burgo.
Relacionadas:
-
Marea Pontevedra ameaza con pedir a reprobación de Anxos Riveiro
Por Redacción |
-
Doce empresas optan a construción do futuro Local social do Burgo
Por Redacción |
-
Medio millón de euros para axudas a entidades sen ánimo de lucro
Por Redacción |
-
O Concello analizará "o que necesita a cidade" para elixir os cursos de formación do plan de emprego
Por Alejandro Espiño |
-
O acondicionamento das oficinas municipais de Ferreiros custará outro millón de euros máis
Por Oskar Viéitez |
-
Pontevedra aproba sen sobresaltos un orzamento de 75 millóns para 2018
Por Alejandro Espiño & Mónica Patxot |
-
Marea confirma que se absterá no pleno de orzamentos
Por Redacción |
-
BNG, PSOE e Marea tumban a emenda do PP ao orzamento
Por Alejandro Espiño |
-
O PP critica a "deriva antisistema" do alcalde Fernández Lores
Por Oskar Viéitez |
-
Os populares demandan a reforma do barrio de A Moureira
Por Redacción |
-
Marea Pontevedra presenta ao BNG unha batería de propostas dirixidas aos barrios e ao rural
Por Oskar Viéitez |
-
Case todos os proxectos financiados con fondos europeos executaranse en 2018
Por Alejandro Espiño |
-
O PSOE confirma que se absterá na votación dos orzamentos ao recoller parte das súas propostas
Por Redacción |