A Consellería licita as obras de reforzo do firme na variante de Marín
Por Redacción
A Consellería de Infraestruturas e Vivenda publica este luns no Diario Oficial de Galicia (DOG) a licitación das obras de reforzo de firme localizado na variante de Marín (VG-4.4), e nas estradas PO-315 e PO-551 por un importe de máis de 761.000 euros.
As empresas interesadas na execución destas actuacións, cun prazo de catro meses, poderán presentar as súas ofertas ata o vindeiro 18 de decembro.
O proxecto define reparacións do firme que permitan prolongar a vida útil do pavimento destas estradas, ao seu paso polos concellos do Morrazo
Na estrada PO-315, nos concellos de Bueu e Cangas, realizaranse reparacións do firme ao longo de toda a estrada mediante fresado e reposición ou extensión de microaglomerado, segundo a necesidade de cada subtramo.
Na PO-551, traballarase na rehabilitación da capa de rodadura mediante a extensión de microaglomerado en numerosos tramos da estrada, nos concellos de Marín, Bueu, Cangas e Moaña.
Na variante de Marín (VG-4.4), repararase o firme mediante o fresado e a reposición entre o punto quilométrico 0 e o 4,400, nos concellos de Pontevedra e Marín.