Máis de medio milleiro de persoas se deron cita na discoteca Reivi para asistir á gala benéfica "Ponte Caldelas Solidaria" organizada pola coordinada de asociacións, que aglutina á sociedade civil pontecaldelá, e na que interviron os humoristas Tacho González, Miguel Sincero, Federico Perez e Pepo Suevos e puxeron o punto musical Laranxada de Limón, Mushu, Guillermo Castro, Mari Costa, Os Coribantes, Stökk, Son das Tabernas, Sete Cuncas e AnodhoR.

Todo o recadado pola organización deste evento será ingresado na conta de Cáritas-Concello e irá destinado aos damnificados polos incendios do pasado mes de outubro, segundo criterios técnicos que determinarán os responsables do departamento de servizos sociais e directivos da ONG.

Os membros da coordinadora "Ponte Caldelas Solidaria" entregaron a cada artista participante un obsequio conmemorativo do seu xesto solidario e da súa participación nesta gala benéfica e agradeceron a establecementos colaboradores e persoas que se solidarizaron coas vítimas do incendio, como unha muller de Cádiz que doou máis de 300 imáns de cociña que foron rotulados co logotipo de "Ponte Caldelas Solidaria".

CEA SOLIDARIA DE CÁRITAS

Por outra banda, tamén se celebrará, o vindeiro venres 24 de novembro, unha cea solidaria de Cáritas que, nesta ocasión, terá lugar na Discoteca Reivi e cuxos ingresos tamén serán destinados aos afectados polos incendios. Esta cea terá un prezo popular de 15 euros, contará cun prato cero de 5 euros e haberá actuacións musicais que animarán ao baile e a diversión na sobremesa deste evento no que están confirmada xa a participación de Laranxada de Limón, cancións mexicanas e as sevillanas da Asociación de Mulleres Rurais Aires del Norte y Olé.

Pantalla completa