Poio lanza "a maior oferta de emprego público dos últimos anos"
Por Oskar Viéitez
O concelleiro delegado de Persoal, Xosé Luís Martínez Blanco, informou sobre as accións e medidas levadas a cabo polo Concello de Poio, publicando a que "sen dúbida, pode considerarse como a oferta de emprego público máis importante dos últimos anos".
A oferta de emprego público 2017, que foi publicada por este concello no Boletín Oficial da Provincia, consta de catro prazas de funcionario de carreira por quenda libre, sendo unha praza de Policía Local (cuxo prazo de presentación de instancias xa rematou con máis de 100 inscritos) e tres prazas de persoal de oficios.
A esta oferta hai que engadir as dúas prazas de funcionario de carreira por promoción interna, sendo unha praza de inspector e unha de oficial de policía (cuxo proceso xa rematou).
Na oferta de emprego público tamén publicáronse seis prazas de persoal laboral fixo por quenda libre, das que tres serán para postos de peón de servizos, dúas prazas para persoal de limpeza e unha praza de técnico medio educador familiar.
O Concello de Poio ten previsto proceder á convocatoria de ditos procesos ao longo do ano 2018. Estas prazas de emprego fixas, cubrirán as baixas existentes en distintos departamentos do Concello como consecuencia das xubilacións e de reaxustes feitos nos servizos municipais.
Mentres non se cubran as prazas publicadas na oferta de emprego oúblico, serán interinos procedentes das bolsas de substitución creadas durante este ano e cuxos procesos de selección xa remataron, os que cubran ditas prazas, presumiblemente, a partires do mes de xaneiro.
Ao longo do 2018, distintos servizos do Concello se verán tamén reforzados, como en anteriores ocasións, a través de subvencións das distintas administracións e de fondos propios do concello reforzando así diferentes servizos.
Así mesmo, hai que destacar os reforzos temporais realizados polo Concello de Poio para aumentar o número de efectivos en servizos tales como a vixilancia de praias (6 persoas), a seguridade cidadá (co reforzo de aproximadamente de 4 a 6 auxiliares de policía por tempada), departamento de turismo (reforzo na tempada estival con 4 persoas), e servizos varios como almacén e outras dependencias do concello.
En definitiva, o Concello de Poio ofertará no ano 2018, máis de 70 postos de traballo entre fixos e temporais.