Mulleres do mar e emprendedoras da ría pontevedresa formaranse en turismo mariñeiro
Por Redacción
O martes 7 de novembro iniciaranse as primeiras sesións dos programas Embarca e Aliadas, dúas iniciativas que buscan reforzar a capacidade de emprendemento, de organización laboral e persoal a través dun programa dobre, aberto e gratuíto, que brinda asesoramento a mulleres con proxectos emprendedores en turismo mariñeiro, no caso do programa Embarca. No programa Aliadas proporciónanse ferramentas para levar a cabo iniciativas de asociacionismo das mulleres do mar.
Para o programa Embarca, o Centro Cultural Xaime Illa de Raxó, en Poio, acollerá o primeiro encontro deste programa de turismo mariñeiro que o GALP Ría de Pontevedra vai poñer en marcha entre os meses de novembro e maio de 2018.
Esta primeira cita será entre as 16 e as 17.30 horas do martes 7 de novembro. Calquera muller interesada en inscribirse pode facelo a través de candieira.net ou no teléfono 886 213 015.
O territorio do GALP Ría de Pontevedra, que afecta os municipios de Bueu, Marín, Pontevedra, Poio, Sanxenxo e Meaño asesoraranse no programa Embarca a todas aquelas mulleres do mar ou emprendedoras que queiran poñer en marcha unha iniciativa relacionada co deseño de produtos e servizos de turismo mariñeiro, ou que conecte a valoración dos recursos pesqueiros cos ámbitos patrimonial, ambiental e económico do territorio.
O programa establece unha serie de pasos que desembocan na posta en marcha dun prototipo ou maqueta da iniciativa. Candieira guiará ás participantes durante varias sesións, ata o mes de maio, para probar o funcionamento da proposta.
Pola súa banda, no programa Aliadas impulsarase o asociacionismo.
O martes 7, o Centro Cultural Xaime Illa acollerá unha dobre sesión desta proposta, centrada en potenciar os lazos asociativos entre as mulleres do mar e que traballará o deseño e a posta en marcha de dúas iniciativas: unha dirixida ao deseño dunha semana cultural do mar da Ría de Pontevedra e outra destinada a mellorar a saúde das traballadoras do mar.
As sesións dividiranse de 17.30 a 19.00 horas para traballar o deseño da Semana Cultural do Mar, mentres que de 19.00 a 20.30 horas a sesión virará sobre como mellorar a saúde das traballadoras do mar.