A Cámara de Comercio inicia o proceso electoral para a renovación do seu pleno
Por Redacción
A Cámara de Comercio de Pontevedra, Vigo e Vilagarcía de Arousa abre este mércores o proceso electoral para a renovación do seu pleno coa exposición do censo, que poderá consultarse en calquera das súas tres sedes físicas ata o próximo 6 de novembro de 2017, así como na web www.camarapvv.com.
A exposición do censo estará a disposición de todos os electores nas oficinas de Pontevedra, Vilagarcía de Arousa e Vigo, e permitirá a corrección de posibles erros durante o proceso electoral.
Neste sentido, do 18 de outubro ao 20 de novembro os electores terán dereito a formular por escrito as súas reclamacións sobre calquera erro que detecten, inclusión ou exclusión das empresas no censo exposto nos grupos e categorías correspondentes, que serán resoltas polo comité executivo da corporación antes do día 5 de decembro.
O proceso electoral que arrinca o mércores resolverase, previsiblemente, en maio ou xuño de 2018 e será o primeiro para a Cámara fusionada.