Convocan 75 becas para residentes médicos, farmacéuticos e enfermeiros
Por Redacción
O patronato da Fundación A.M.A., que preside o pontevedrés Diego Murillo, abriu o prazo da súa sétima campaña nacional de becas para aqueles profesionais sanitarios que preparan as súas especialidades como residentes no presente curso académico 2012/2013.
Cada beca consta dun máximo de 3.000 euros para gastos de docencia, e convócanse este ano baixo o lema "Ao teu lado, nos momentos importantes".
A actual convocatoria inclúe 50 becas para o exame de médicos internos residentes (MIR), 15 máis para o de farmacéuticos (FIR) e outras 10 para o de enfermeiros (EIR). As 75 adxudícanse por sorteo entre todos os candidatos inscritos na web da Fundación, www.amaseguros.com, entre o 15 de outubro de 2012 e o 11 de febreiro de 2013. O sorteo celebrarase dous días máis tarde, o próximo 13 de febreiro.
A.M.A. Agrupación Mutual Aseguradora, a única mutua de seguros para profesionais sanitarios, constituíu en 2010 o seu Fundación. A través dela vén impulsando en España e Portugal a formación e a investigación sanitaria e do seguro asistencial, a través de actividades propias e da colaboración e coordinación con Colexios e institucións profesionais sanitarias e privadas.
A convocatoria de becas A.M.A. é das poucas nacionais concedidas por sorteo puro. O único requisito exixible aos candidatos é ser ben licenciados en Medicina ou Farmacia, ben diplomados en Enfermería, ou ben ser estudantes de último ano que prevexan finalizar os seus estudos antes da data do sorteo. Para participar, basta con cumprimentar un formulario na páxina web da mutua.
O 13 de febreiro, un notario escollerá mediante sorteo entre todos os inscritos en prazo aos 75 becarios, con outros tantos suplentes. Cada beca abónase previa presentación de facturas do centro docente en concepto de matrícula ou cotas establecidas para o pago dos respectivos cursos de internos residentes.