O xerente do CHOP acode a Baltar para coñecer a situación do centro de saúde
Por Oskar Viéitez
O xerente do Complexo Hospitalario de Pontevedra (CHOP), José Ramón Gómez, visitou este luns o centro de saúde de Baltar acompañado do alcalde de Sanxenxo, Telmo Martín, con quen avaliou as necesidades deste servizo sanitario.
Entre outros temas abordaron a situación do servizo de pediatría que conta cun especialista e un médico de familia con formación en puericultura en substitución do pediatra que se xubilou a principios deste ano.
Desde o goberno local de Sanxenxo sinalaron que en Galicia hai déficit desta especialidade polo que se está recorrendo a médicos de familia, polo que apuntan que "se trata dun problema que supera o ámbito autonómico, de feito, hai comunidades como a madrileña nas que case o 50% das consultas de pediatría son atendidas por médicos de familia. É o Ministerio de Sanidade o que ten a competencia para aumentar as prazas do MIR nesta especialidade".
En Sanxenxo cada consulta de pediatría ten adscritos 1.150 nenos menores de 14 anos. O goberno local apunta que "se cumpre, por tanto, a cociente que recomenda a sociedade española de pediatría, que establece que non debe superar os 1.200 nenos. Pero é evidente que nos achegamos a límite, por tanto, o alcalde de Sanxenxo solicitou ao xerente do CHOP que se estuden medidas que a medio prazo permitan mellorar a consulta de pediatría".
En canto á ambulancia medicalizada, que permanece en Sanxenxo entre o 1 de xullo e ao 31 de agosto, o alcalde trasladou ao xerente a necesidade de ampliar este período aos meses de xuño e setembro tendo en conta que son meses dun gran crecemento da poboación. Por exemplo, se en agosto hai en Sanxenxo máis de 120.000 persoas en setembro e xuño hai momentos en que se superan as 60.000 persoas.
Neste sentido o xerente remitiu ao 061 que é o departamento responsable da distribución das ambulancias medicalizadas.
Por último, o terceiro tema que se tratou é a necesidade de ampliar o centro de saúde de Baltar, cuxa última remodelación fíxose no 2001. O xerente José Ramón Gómez expuxo dúas opcións, a primeira sería ampliar a actual sala de extraccións e dotala dun novo acceso pegado ás urxencias e a outra opción sería facer unha nova sala no acceso principal do centro de saúde.
Pola súa banda, o Concello comprometeuse a revisar cos técnicos municipais a entrada principal ao centro de saúde, estudando a posibilidade de instalar unhas escaleiras anexas ao actual acceso, por ser unha demanda dos veciños.
Relacionadas:
-
Sanidade comprométese a buscar solucións á falta de pediatras en Baltar
Por Redacción |
-
Usuarios do centro de saúde de Baltar volverán mobilizarse polas carencias
Por Oskar Viéitez |
-
O Sergas nega demoras no PAC de Baltar fronte a quen denuncia que o centro de saúde está "desbordado"
Por Oskar Viéitez |
-
O PP rexeita no Parlamento dotar dunha ambulancia medicalizada á comarca do Salnés durante todo o ano
Por Oskar Viéitez |