Xa está na rúa o programa da Festa do Marisco
Por Redacción
O Concello do Grove presentou o programa completo da LIV edición da Festa do Marisco. Como ven sendo habitual, as actividades xa deron comezo a pasada semana co campionato canino celebrado na Illa da Toxa e tamén se contará con actividades durante o mes de setembro.
Xa o 5 de outubro comezará a Festa do Marisco onde, como xa se destacou en anos anteriores, a música é unha protagonista fundamental.
Ademais dos "Concertos do Marisco" este ano destaca o programa "Música de Galicia na Festa do Marisco" que pretende achegar aos veciños do Grove e aos visitantes o folclore galego dende un punto de vista amplo, Vai dende a música máis tradicional (coa Banda de Instrumentos Populares de Suso Vaamonde) ata a que conta con máis historia (co Orfeón Marítimo do Berbés) ou novas perspectivas (como a do gaiteiro Xulio Lorenzo que presentará, ademáis, a muiñeira de Floreano).
Debe destacarse ademais no programa da festa a colaboración dos colectivos culturais e deportivos locais que participan en distintas actividades e exhibicións, como a que realiza o Club Biqueira ou a Escola de Baile Cantodorxo e o grupo folclórico Paradanda-Mecos, ou todos os participantes na "Pandeiretada" entre outros. Mantéñense no programa as citas tradicionais como a carreira popular, as regatas de dornas a remo e a vela e o encontro de vespas e lambretas.
A cociña en vivo tamén sigue presente, contando ademais este ano con catas de viño da man da Ruta do Viño Rías Baixas da que O Grove é membro. Tamén Emgrobes realizará as súas mostras, a Confraría de Pescadores trasladará as súas mostras mensuais á carpa e volveremos a ter ocasión de ver receitas co Rodaballo de Insuiña. No mesmo espacio da Cociña en Vivo tamén se celebrará o tradiciona concurso de pratos de mexillón de Amegrove.
Dende o Concello do Grove facilitaranse detalles das distintas actividades incluídas no programa ao longo da vindeira semana, que culminará o venres coa presentación da Festa do Marisco en Barcelona.