Unha moza denuncia un asalto violento en Campolongo
Por Redacción
Unha moza de 18 anos denunciou na Comisaría Provincial de Pontevedra un asalto violento que sufriu na madrugada do martes ao mércores no barrio de Campolongo. Segundo relata, dispoñíase a entrar no portal do seu edificio cando foi asaltada por un home e, tras un forcexeo con grandes doses de violencia, el escapou levándolle o seu teléfono móbil.
A moza chamou á Policía Nacional xa de madrugada e ao día seguinte -na tarde do mércores- oficializou a denuncia e prestou declaración na Comisaría, que abriu unha investigación para aclarar o ocorrido e conseguir localizar ao asaltante.
Segundo relatou a moza á Policía Nacional, o home asaltouna por detrás cando se dispoñía a entrar no portal e ela tentou liberarse mentres gritaba pedindo axuda. Finalmente, unha veciña saíu pola xanela alertada polos berros e, ao darse conta de que lle descubrían, o home escapou. Previamente, agredira á moza de forma moi violenta.
No asalto, o home logrou facerse co teléfono móbil da moza, aínda que non transcendeu se finalmente levoullo ou, como apuntan algunhas fontes, acabouno tirando aos poucos metros.
A Policía Nacional mantén aberta unha investigación e conta con datos achegados sobre o sospeitoso, pero á primeira hora deste xoves fontes oficiais da Comisarái indicaron que aínda non fora localizado nin se produciu ningunha detención.
O incidente empezou a correr como a pólvora por todo Pontevedra ao longo da tarde deste mércores a través de publicacións en Facebook e grupos de WhatsApp, nos que se publicou un audio que relataba un intento de violación no barrio de Campolongo. A publicación xerou gran preocupación veciñal, pois relata que "tentaron violar" a unha moza. Ata o momento, non se confirmou nin esta versión nin ningunha outra e a Policía Nacional mantén abertas todas as hipóteses.