Por segundo ano consecutivo, PontevedraViva Radio abre un ciclo de tres faladoiros con motivo do desenvolvemento da Feira Taurina de Pontevedra. O 5 de agosto arrincan os festexos cun concurso de recortadores, que como novidade, en lugar de celebrarse como peche, será a primeira cita na praza de San Roque. O domingo terá lugar a primeira corrida de abono.
Da terna que conforman Antonio Ferrera, Julián López "o Juli" e Roca Rey, os catro convidados coinciden na espectación que esta tempada leva consigo Antonio Ferrera. No caso pontevedrés o cartel complétano os touros de Alcurrucén, dos que se espera un "mellor trapío" que nas tardes pasadas, comentan nestas Conversas na Ferrería, entrando nun debate sobre os touros que se lidan nesta capital e noutras prazas.
Pepé Maquieira, webmaster de Taurophilos; Gonzalo Lorenzo, Alejandro Pedras e Juan Riveiro, presidente da Coordinadora de Peñas Taurinas de Pontevedra, coinciden igualmente en apuntar que a segunda corrida da feira: cos irmáns Paquirri e Cayetano e o rejoneador Diego Ventura, debería celebrarse cunha boa entrada. E o último cartel da feira, engaden, debería encher a praza. (Touros de Santiago Domecq para Juan do Álamo, Alvaro Lorenzo e Ginés Marín).