A praza Marqués de Valterra acollerá unha mostra sobre a historia de Lourizán
Por Redacción
A praza de Marqués de Valterra será escenario da exposición sobre a parroquia de Lourizán que este venres, 9 de xuño, inaugurarase ás 20.30 horas. O concelleiro Demetrio Gómez presentaba os detalles desta mostra que se poderá ver ata finais de mes e que recolle diversas etapas da historia deste espazo desde as últimas reformas e obras ata os seus inicios.
A través de 48 fotografías recollidas e tratadas polo fotógrafo Emi Ramírez poderase ver a evolución desta zona do municipio. As imaxes irán acompañadas de contidos documentais a cargo do arquiveiro municipal Enrique Sotelo.
A exposición realízase con motivo do proxecto de rehabilitar como Casa da Cultura o antigo mercado da parroquia. Recóllense datos sobre o ferrocarril, as igrexas, o tranvía, o pazo de Lourizán ou o mar. Tamén se fai un repaso ao ARI e ás accións de restauración que se desenvolveron en Estribela.