Condenan o Concello a pagar os danos causados en dous coches por unha árbore e un contedor
Por Redacción
O Concello de Pontevedra deberá pagar máis de 1.200 euros aos propietarios de dous coches que nos dous últimos anos sufriron danos por mor dun colector de recollida de lixo desprazado durante un temporal e dunha árbore caída. En ambos os casos, os donos afectados chegaron ao xulgado e a administración local acabou condenada ao pago dos gastos de reparación.
O portavoz do goberno local, Raimundo González, explicou que en ambos os casos o Concello aceptou o pago cando chegou ao xulgado. Previamente non abonara as cantidades solicitadas porque entendía que non había un nexo causal entre o Concello e a árbore ou o colector desprazado, pero, xa no xulgado, o avogado municipal si a recoñeceu.
O primeiro dos incidentes produciuse o 15 de setembro de 2015 no polígono de O Campiño. Unha árbore situada en dominio público en terreos do Concello caeu e causou danos nun coche por importe de 923,46 euros.
O segundo suceso rexistrouse o 13 de abril de 2016 durante un temporal. Un colector situado nunha rúa de Monte Porreiro desprazouse a causa do forte vento e golpeou un coche no que se xeraron danos por valor de 312,27 euros.
SANEAMENTO NOS AREÁS DE MOURENTE
A Xunta de Goberno local aprobou este luns a contratación da instalación da rede de abastecemento de auga no lugar dos Areás, na parroquia de Mourente, entre Os Campos e Monte Porreiro.
A instalación da nova rede ten un custe de licitación de 104.753,74 euros e unha lonxitude de 700 metros. Como novidade, a instalación da rede suporá a substitución de todo o firme da rúa. Esta decisión estenderase a outras obras futuras do Concello: cando se fagan obras na vía de menos de catro metros de ancho, asfaltarase toda a rúa; e cando se trate dunha vía de dobre dirección está previsto o pavimentado de todo o carril de circulación.