Cerdedo-Cotobade busca garantir o abastecemento de auga
Por Redacción
O Concello de Cerdedo-Cotobade está buscando garantir o abastecemento e subministro de auga a todos os veciños e por iso puxo en marcha recentemente un plan de melloras para o almacenamento de auga que xa deu, como primeiros froitos, a construción de novos depósitos en Tomonde e Folgoso.
Esta iniciativa, que se prevé de gran importancia para o verán ante a seca destes últimos meses, vaise estender a outros puntos do municipio, xa que está prevista a creación doutros sete puntos de depósito en Vilalén, Tresaldeas, Quireza, Framil, Peniñas, Meilide e Cavenca-Revolta.
O goberno local, que adicou un investimento duns 90.000 euros á construción destes dous primeiros depósitos, efectuou en primeira instancia un estudo de arquitectura e enxeñería para garantir o subministro das aldeas e parroquias, xa que moitos dos depósitos presentaban deficiencias polo paso do tempo e padecían roturas e perdas de auga.
Posteriormente, celebráronse reunións veciñais para decidir a ubicación máis acaída para os novos depósitos, que serán complementarios dos antigos. Estes manteranse en funcionamento para atender posibles urxencias e que haxa unha dobre alternativa de abastecemento.
As novas infraestruturas contan con características comúns e están construídas en formigón con dúas cámaras de almacenamento que dispoñen de chaves de paso independentes para a realización das tarefas de vaciado ou limpeza.
Finalmente, esta actuación completarase coa mellora e ensanchamento das pistas de acceso a estes novos depósitos co propósito de facilitarlle a chegada aos veciños para que poidan acometer con comodidade as labores de limpeza dos mananciais.
ZONAS DE BAÑO FLUVIAL
As zona de baño de Carballedo (río Almofrei), a área do Pozo Negro en Rebordelo (río Almofrei), a contorna de Viascón (río Cabanelas) e o espazo recreativo de Xesteira (río Almofrei), presentan as mellores condicións para o baño ante a apertura da tempada o vindeiro luns. Todos eles veñen de obter un nivel "excelente" na calidade das súas augas, segundo os datos oficiais de mostraxe publicados pola Dirección Xeral de Saúde Pública.
Relacionadas:
-
Cerdedo-Cotobade financiará a creación 14 depósitos de auga no municipio
Por Redacción |
-
A Xunta financia obras de saneamento en Viascón
Por Oskar Viéitez |
-
O lugar de Atalaia, en Viascón, loce novos accesos
Por Redacción |
-
Os investimentos propios de Cerdedo-Cotobade ascenderán en 2017 a case un millón de euros
Por Redacción |