Demetrio Gómez releva a Eva Villaverde como responsable comarcal do BNG
Por Alejandro Espiño
Tras un ano como responsable comarcal do BNG en Pontevedra, Eva Villaverde será substituída no cargo polo edil pontevedrés Demetrio Gómez. Trátase dun relevo que se produce tras a entrada da deputada provincial na executiva nacional do BNG, que obrigou aos nacionalistas a iniciar unha renovación que, destacan, está a ser "tranquila e ordenada".
A asemblea comarcal apoiou por unanimidade este cambio na dirección que tamén afecta ao ata agora vicerresponsable, Manu Lourenzo -portavoz do BNG en Soutomaior-, que será substituído por Anabel Gulías, tamén concelleira en Pontevedra.
Demetrio Gómez explicou que a nova dirección traballará coa vista posta nun "fito marcado" no calendario, as eleccións municipais de 2019.
Para esta cita coas urnas, o dirixente nacionalista explicou que na comarca o BNG chegará cun traballo "importante" ás súas costas: tres alcaldías -catro se non fóra pola moción de censura en Pontecesures- e a súa presenza noutros dous gobernos municipais.
Ademais, o BNG buscará "afianzar" a organización política e que o partido "traballe como unha única persoa" en toda a comarca, ao estar convencidos de que Galicia necesita un nacionalismo "forte"; e actuar "coordinadamente" coa dirección nacional do partido que encabeza Ana Pontón e onde Pontevedra "ten un peso destacado", segundo Gómez.
Demetrio Gómez e Anabel Gulías estarán, xunto con Lourenzo e Marga Caldas, concelleira en Poio, á fronte deste novo consello comarcal, composto por corenta persoas. Neste órgano están representados os catorce concellos que forman a área territorial do BNG -tras a incorporación de Cuntis- e hai unha notable presenza de militantes de Galiza Nova.
Un de cada catro membros deste consello comarcal son integrantes das mocidades do BNG, con Sabela Bará e Alberte Fernández á cabeza. Xunto a eles están tamén os alcaldes de Pontevedra, Poio e Barro, os tres municipios que gobernan os nacionalistas, catro membros da dirección nacional ou o ex portavoz nacional, Guillerme Vázquez, entre outros.
"Temos un grupo que pode facer un traballo importante", destacou Demetrio Gómez.
Relacionadas:
-
O BNG renova as súas estruturas en Caldas e Vilagarcía
Por Redacción |
-
Xosé Luís Martínez, reelixido responsable local do BNG en Poio
Por Oskar Viéitez |
-
Pontevedra reforza a súa posición no BNG liderado por Ana Pontón
Por Redacción |
-
RADIO.- Ana Pontón, unha nena tranquila e estudiosa que chegou a facer os seus tenteos cantando
Por Marisa Ciordia |