A marea vermella entra pola ría de Pontevedra
Por Oskar Viéitez
Primeiros peches de bateas do ano na ría de Pontevedra pola marea vermella.
O Instituto Tecnolóxico para o Control do Medio Mariño (Intecmar), decretou a prohibición de extracción de moluscos bivalvos en catro polígonos bateeiros ao detectarse a presenza de toxinas do tipo lipofílicas, entre as que destaca a toxina diarreica (DSP).
En concreto os polígonos afectados son os de Portonovo A e Bueu A2, ambos na ría de Pontevedra.
E de xeito cautelar o Intecmar tamén prohibe a extracción de mexillón nos de Portonovo B e Portonovo C.
Trátase en definitiva da primavera que tamén chega ás rías
Desde este centro analítico dependente da Consellería do Medio Rural e do Mar esperan que nos próximos días aumenten os peches tanto nesta ría como, previsiblemente, nas de Vigo, Arousa e Muros-Noia.
Recordan desde este centro de referencia internacional que este é un proceso natural, restándolle importancia a esta incidencia que ata chegan a valorar como positiva.
Trátase en definitiva da primavera que tamén chega ás rías e con ela os afloramentos, o cambio de correntes, o aumento do fitoplacton, e como non, as biotoxinas.