"Que ten que ocultar Louzán para non facer pública a súa declaración de bens?", pregunta o PSdeG-PSOE
Por Redacción
Os deputados do grupo provincial do PSdeG-PSOE autorizan ao secretario xeral da Deputación de Pontevedra á publicación das súas declaracións de intereses na páxina web "ao igual que fan outras institucións". Asegurouno Santos Héctor, voceiro dos socialistas, ao entender que "non temos nada que agochar nas nosas declaracións e que poden ser consultadas por todos os cidadáns que así o solicitan".
Nun comunicado, Santos Héctor critica a actitude do presidente da Deputación, Rafael Louzán, de agochar a súa declaración cando os presidentes das entidades de Ourense e Lugo xa o fixeron. "Qué ten que agochar Louzán que se nega a publicar a súa declaración de bens incluso cando o presidente da Xunta e presidente do seu partido o está a reclamar", sinala.
O voceiro socialista destaca que en aras da transparencia dos cargos públicos, os deputados do PSdeG-PSOE na Deputación de Pontevedra non teñen ningún inconveniente en que as súas declaracións sexan públicas. E con respecto á postura de Louzán insiste: quen "non ten nada que esconder non necesita buscar subterfuxios senón dar transparencia nestes momentos que os políticos son tan criticados".
Para Santos Héctor, a actitude de Louzán é máis chamativa incluso, cando o presidente do seu partido, Alberto Núñez Feijóo, está facendo un chamamento aos presidentes das catro deputacións para que publiquen os seus datos das declaracións de intereses.
"Todos coñecemos as retribucións dos órganos de goberno da Deputación a través dos orzamentos deste ano e a publicación da declaración de intereses daría unha maior transparencia á institución", conclúe Santos Héctor, que remata indicando que a súa declaración pódese consultar la páxina web do Concello de Vigo "desde principios desta lexislatura".