Sen acordo aínda para aprobar un novo regulamento do pleno
Por Alejandro Espiño
O novo regulamento do pleno terá que seguir esperando. Polo menos, un mes máis. Os partidos que forman parte da corporación municipal aínda non se puxeron de acordo para modificar a normativa que rexe estas sesións plenarias.
O portavoz do goberno municipal, Raimundo González, explicou que hai un mes o BNG remitiu a todos os grupos unha proposta que incluía cambiar o día de celebración dos plenos, dos luns aos venres, e convocalos o antepenúltimo venres de cada mes.
Ademais, propoñía respectar o acordo alcanzado no seu día para que, como máximo, cada partido puidese presentar dúas mocións no pleno; e suxería a posibilidade de regular os tempos de intervención para reducir a duración das sesións. Estas dúas cuestións estaban, con todo, abertas a propostas da oposición.
Pero desde entón, dixo González, ningún grupo presentou unha proposta alternativa, salvo Marea que si falou persoalmente co concelleiro de Réxime Interior, Vicente Legísima. Por iso, o goberno espera que nas próximas semanas póidase avanzar nesta nova regulación.
Mentres tanto, o pleno seguirá celebrándose o penúltimo luns de mes, neste caso o día 20. Será unha sesión de escaso calado e no que as mocións presentadas polos partidos monopolizarán o debate, xa que o goberno tan só dará conta da liquidación do orzamento de 2016 e pedirá o apoio para a IXP Ribeiras do Morrazo.
Así, o Partido Popular presentará iniciativas para a mellora do parque Amalia Álvarez, para a creación dun censo de instalacións deportivas, para a adhesión da cidade a un plan estatal pola bicicleta e unha moción sobre conciliación e corresponsabilidade. Ademais, preguntará pola nova prórroga das piscinas de Campolongo.
Pola súa banda, o PSdeG-PSOE rexistrou mocións sobre as retribucións irregulares a Viaqua, sobre o futuro campo de fútbol de Salcedo e para que se tomen medidas para resolver o abandono que sofre o barrio de Mollabao e a contorna de Pasarón e o Pavillón Municipal de Deportes.
O pleno completarase coas mocións de Cidadáns para que se modifique o imposto de plusvalías e para que fagan melloras na zona onde se situará o novo centro de Rexurdir; e a iniciativa de Marea para que a corporación inste á Xunta a manter o uso sanitario do Hospital Provincial tras ampliar Montecelo.
Relacionadas:
-
O PP quere un reparto no número de mocións proporcional á representación de cada partido
Por Redacción |
-
O Pleno de Pontevedra estrearase en venres abordando unha modificación de crédito de 2,7 millóns
Por Redacción |
-
A ausencia de dous edís do PP impide a reprobación ao BNG polo contrato da auga
Por Alejandro Espiño & Mónica Patxot |
-
Os socialistas piden a implicación da Deputación para construír un campo de fútbol en Salcedo
Por Oskar Viéitez |
-
O PP critica que a Mesa pola Bicicleta leve dende agosto sen reunirse
Por Oskar Viéitez |
-
O BNG esixe á UE que recoñeza "de inmediato" o viño Ribeiras do Morrazo
Por Alejandro Espiño |
-
María Rey quere que o Goberno inicie os trámites que permitan a devolución do imposto de plusvalía
Por Oskar Viéitez |