Ollo ao tráfico no Nadal!: ata o 7 de xaneiro haberá restricións
Por Redacción
Controlar o tráfico de forma que se limite maioritariamente ás rúas perimetrais e evitar os atoamentos. Son dous dos principais obxectivos do operativo especial de tráfico que pon en marcha a Policía Local de Pontevedra ata o próximo 7 de xaneiro.
Así, para combater os problemas que xera o alto volume de vehículos que circulan polas distintas rúas da cidade nestas datas, a Policía Local busca desconxestionar vías que teñan un alto risco de quedar colapsadas.
Os axentes tratarán de manter a circulación no anel primario que forma Xosé Malvar, Bos Aires, Uruguai, Corbaceiras, Manuel do Palacio, Fernández Ladreda, Estación, Eduardo Pondal e 12 de novembro, buscando que o movemento nelas sexa continuo.
Haberá unha especial atención na entrada e saída dos aparcamentos soterrados, coa fin de garantir a máxima fluidez do tráfico; ou na intersección entre Uxío Novoneyra e Eduardo Pondal, entrada principal ás rúas do centro da cidade como Benito Corbal, Sagasta ou Castelao.
Nesa zona os axentes prevén problemas polo que haberá cortes ou desvíos de tráfico puntuais. Prohibirase o xiro á esquerda dos vehículos procedentes de Augusto García Sánchez cara a Uxio Novoneyra. En caso de colapso do tráfico e antes de que afecte ao centro, procederase ao corte total de Uxío Novoneyra, salvo para transporte público, emerxencias e residentes.
Tamén Barcelos terá un especial seguimento. Haberá desvíos puntuais cara San Antoniño e Rouco e impedirase o acceso desde a ponte de Santiago, para facilitar a saída de vehículos procedentes das rúas Cobián Roffignac e Padre Amoedo, ou sentido Bos Aires-Padre Gaite, podéndose efectuar cortes a altura da ponte de Santiago cara a Avenida Compostela.
A rotonda da Alameda con Raíña Vitoria tamén pode sufrir restricións ou desvíos cara San Roque, para facilitar o tráfico de saída cara a ponte da Barca.
A zona peonil de Benito Corbal provocará que o tráfico rodado sexa lento por ese ámbito urbano, polo que en momentos puntuais se desviará o tráfico de San Antoniño cara a Casimiro Gómez, prohibindo o acceso a Javier Puig cara a Benito Corbal.
A Policía Local prevé os días 23, 24 e 31 de decembro e o 5 de xaneiro como datas de risco alto. Os horarios de especial incidencia será de 10.30 a 12 horas, de 13.15 a 14.30 horas e, especialmente, de 18.45 a 21 horas. En todo caso, recomendan a utilización dos aparcadoiros disuasorios do pavillón, o Recinto Feiral, peirao das Corbaceiras, Mollabao, Pasarón e Xoan Carlos I.