Tras o campus universitario, outro gran produtor de residuos orgánicos decidiu sumarse ao plan de compostaxe municipal. Trátase do cuartel da Brilat, segundo desvelou este martes a concelleira responsable deste proxecto, Carme da Silva. En concreto, instalaranse dez módulos de composteiros na base militar, que serán atendidos por persoal propio do exército.

Da Silva explicou que a Brilat dispón dun gran comedor, onde conta con cociña, que serve centos de menús cada día. Ao non alimentar aos soldados mediante catering, senón preparando alí a comida, a base xera unha importante cantidade de residuos orgánicos que, agora mesmo, acaban nos colectores.

Tras un contacto inicial do alcalde co xeneral da Brilat, representantes do Concello e da Deputación de Pontevedra mantiveron unha reunión con mandos responsables da base para presentarlles o proxecto e solicitarlles a súa incorporación a este plan de compostaxe.

Unha vez logrado a aprobación dos órganos militares correspondentes, a brigada pontevedresa confirmou que se suma a esta iniciativa. Neste caso, serán os propios traballadores da base os que fagan as obras necesarias para instalar estes composteiros.

Ademais, despois dunha formación que impartirán os mestres composteiros da Deputación, será o seu propio persoal o que se forme para xestionar eles mesmos todo o proceso de compostaxe.

Carme da Silva destacou que a incorporación da Brilat a este proxecto supoñerá un avance notable, xa que a base realiza unha gran cantidade de podas ao longo do ano, polo que poden achegar o material estruturante necesario para a produción do compost.

CONTACTOS INICIAIS CO SERGAS

Ademais, a edil do BNG avanzou que o Concello tamén iniciou contactos co Sergas para instalar módulos de compostaxe en Montecelo e no Hospital Provincial, unha iniciativa que foi "ben recibida" polos responsables do complexo sanitario.

En ambos os centros hospitalarios hai cociñas onde se preparan as comidas dos pacientes, polo que se xera unha gran cantidade de residuos orgánicos.

Actualmente é o propio Sergas o que xestiona os seus recursos, salvo unha pequena parte que acaba nos colectores do servizo xeral de recollida en Pontevedra, ao contar con refugallos biolóxicos e material sensible.

A súa incorporación ao proxecto de compostaxe municipal sería "importante", segundo Da Silva, e permitiría ao Sergas un "notable" aforro económico nesta materia.