Desconvocada a folga do comercio da alimentación para esta semana
Por Cristina Saiz & Natalia Puga
Os traballadores do comercio da alimentación da provincia de Pontevedra decidiron este domingo desconvocar a folga que estaba prevista para este luns 5 e este mércores 7 de decembro en todo o sector.
A decisión adoptárona os traballadores tras celebrar senllas asembleas en Pontevedra e Vigo na mañá deste domingo. De media, o 96% dos asistentes acordaron aceptar o preacordo asinado pola mesa negociadora esta semana, de modo que a folga queda desconvocada. Xa fora comunicada á autoridade laboral, de modo que este mesmo domingo xa lle foi comunicado por vía telemática que queda sen efecto, segundo explicou o representante de UGT, Carlos Esperón.
Segundo Esperón, o número de traballadores acudiu ás asembleas este domingo foi superior ao da semana pasada, na asemblea na que se acordou convocar a folga. No caso de Pontevedra, máis de 150 empregados déronse cita no salón de actos do edificio sindical da rúa Pasantería. Estaban representadas as catro centrais sindicais con maior representatividade no sector.
Os traballadores valoraron como positivo o principio de acordo na negociación do convenio colectivo alcanzado polos sindicatos e a patronal o pasado 30 de novembro, no que pactaron un novo convenio que terá catro anos de vixencia, cun incremento salarial do 1% en 2016 e 2017 e do 1,50% en 2018 e 2019.
O acordo que axudou a que se desconvocase a folga establece 31 días de vacacións anuais, dos cales 16 deben ser gozados entre o 1 de xuño e o 30 de setembro, con tres días de permiso por asuntos propios, ademais de 22 días por lactación e a opción de garda legal por coidado de fillos ata os 14 anos.