Un novo xigante chega ao porto de Marín
Por Redacción
O novo guindastre Post-Panamax que complementa o equipamento de Termarín (terminal de colectores do Porto de Marín) atracou este venres no Peirao Reboredo para comezar os labores de acondicionamento previas á súa instalación no peirao.
O guindastre foi adquirido polo Grupo Pérez Torres, concesionario da terminal marinense e chegou procedente do porto italiano da Spezia de onde partiu o pasado 18 de novembro. Espérase que o guindastre estea completamente operativo nas próximas semanas.
Pérez Torres Marítima reforza deste xeito a súa aposta polo tráfico de colectores no Porto de Marín. A adquisición dun guindastre Post-Panamax enmárcase dentro do seu plan de investimentos co obxectivo de seguir incrementando a capacidade operativa da terminal.
Este guindastre mellora o rango de elevación das dúas xa existentes e permite operacións máis rápidas e con buques de maior porte. Ademais, incorpora un sistema de "twin spreader" (sistema elevador de colectores), que permite a descarga de dous colectores de 20 pés cheos de forma simultánea.
As instalacións da empresa Pérez Torres Marítima en Marín están altamente especializadas no tráfico de colectores tanto para carga seca como refrixerada. Para iso conta en Marín con máis de 500 conexións reefer, zona de consolidación e desconsolidación, almacéns cubertos, reach stackers (vehículo especializado para mover colectores) con capacidade de elevación a cinco alturas, zona de lavado e reparación de colectores frigoríficos, etc...
O Porto de Marín está a rexistrar un crecemento continuo no tráfico de mercadoría en colectores nos últimos exercicios. Só ata o mes de setembro deste ano, incrementouse un 40% o movemento de colectores con respecto ao mesmo período do ano anterior. Marín é primeira escala en Europa para liñas transoceánicas e conta con conexións feeder con todo o mundo. O Porto dispón ademais doutros servizos engadidos que outorgan axilidade ás operacións dos grandes buques como o Posto de Inspección Fronteiriza ou a conexión ferroviaria directa.
O novo guindastre portacontedores Post-Panamax, que se suma os dous cos que xa contaba a terminal, chegou a bordo do buque Sun Rise, auxiliado na atracada polos remolcadores de Amar Marín. Dáse a casualidade de que se trata do mesmo buque que trasladou o terceiro xogo de esclusas para a Canle de Panamá.
Relacionadas:
-
A chegada de Maersk a Marín impulsa ao porto a un rexistro histórico no tráfico de mercadorías
Por Redacción |
-
A pesca conxelada crea un milleiro de empregos directos no Porto de Marín
Por Redacción |
-
Maersk obtén autorización do consello de administración do Porto para operar en Marín
Por Redacción |
-
A ilegalización dos recheos do porto paraliza un investimento de 3,5 millóns de euros
Por Oskar Viéitez & Mónica Patxot |