A terceira edición dos premios Ernestina Otero xa teñen gañadores
Por Redacción
Catro traballos universitarios veñen de ser galardoados na cuarta edición dos premios Ernestina Otero, organizados polo Concello de Pontevedra para recoñecer investigacións relacionadas co fomento da igualdade entre homes e mulleres, así con promover a sensibilización e participación da cidadanía nesta materia.
Dotados cun premio económico de 1.000 euros, un total de 17 proxectos, defendidos ao longo do curso 2015-2016, concorreron á presente edición destes premios.
Os tres premios na categoría de traballo de fin de grao foron:
- O impacto da coeducación no desenvolvemento persoal, de Tamara Fernández Amosa. É un traballo que, segundo o xurado, aporta unha boa metodoloxía e unha boa proposta de intervención partindo dun diagnóstico inicial. Existe ademais unha auto avaliación na que se recollen propostas de mellora nun campo tan prioritario de traballo como é o educativo.
- A educación afectivo-sexual en persoas con diversidade funcional e intelectual, de Bárbara Penas Rey. O xurado recoñeceu a súa valentía no tema que trata poñendo o foco nunha realidade que normalmente se agacha, visibilizando unha realidade que non se quere ver e dando voz aos protagonistas fomentando a súa autonomía.
- Escola de Igualdade: Proxecto de formación en igualdade de xénero para o monitorado de Noites Abertas, de Ignacio Márquez Collazos. É un traballo práctico que avalía unha experiencia que xa está en marcha propoñendo vías de mellora.
Pola súa banda, na categoría de traballos de fin de master o premio foi para As bruxas non me dan medo (o que me dá medo son os fillos de puta), de Rebeca López Villar, que debulla o concepto "bruxa" na creación audiovisual contemporánea e pon de manifesto a importancia da obra artística para a difusión das mensaxes.
Os galardóns entregaranse nun acto público que se celebrará na Casa da Luz o vindeiro luns 28 de novembro.
O xurado que outorgou estes premios por unanimidade estivo composto por Carmen Fouces, concelleira de Igualdade; Rosa Campos, directora do CIM; Anabel G. Penín, directora da Unidade de Igualdade da Universidade de Vigo; Montserrat Golías, representante da Universidade da Coruña; e Dolores Vilavedra, en representación da USC.
Relacionadas:
-
Os Premios Ernestina Otero poñen o ramo os actos do 25-N
Por Mónica Patxot |
-
A perspectiva feminina na banda deseñada será premiada en Pontevedra
Por Alejandro Espiño |
-
Dezasete traballos universitarios optan aos premios Ernestina Otero
Por Redacción |
-
Igualdade convoca unha nova edición dos premios Ernestina Otero
Por Redacción |
-
Desmontar estereotipos nas aulas e a arte ten premio
Por Redacción & Cristina Saiz |