Os centros de ensino público de Monte Porreiro están de aniversario
Por Redacción
Os centros de ensino público de Monte Porreiro teñen colgada ás portas dos seus colexios unha pancarta co lema "X aniversario da fusión. Celebrando a escola pública de Monte Porreiro". A colocación desta pancarta fíxose logo da reunión que mantiveron todas as entidades do barrio, coas comunidades educativas e tamén o Concello no CEIP Marcos da Portela.
Estará nos institutos durante todo o curso e é unha das actividades incluídas dentro da programación de actos de celebración do X aniversario da escola pública do barrio.
Ademais da instalación destas lonas e do magosto que celebrou o barrio o pasado 5 de novembro, a programación de celebración do X aniversario da escola pública de Monte Porreiro complétase con outras accións como actuacións do grupo Migallas nos dous centros de ensino ou a proxección dunha curtametraxe de Fina Casalderrey.
Os actos rematarán o vindeiro 1 de decembro cunha homenaxe na Casa da Cultura ás persoas que loitaron pola educación pública e de calidade. Será a partir das 19.00 horas e está previsto a proxección dun audiovisual; unha actuación musical; a entrega dun agasallo ás persoas que tiveron un papel destacado na fusión.
Hai unha década que a reordenación dos centros educativos de Infantil e Primaria deron lugar ao nacemento da EEI Fina Casalderrey e o CEIP Marcos da Portela como un continuo educativo, deixando atrás a desaparecida escola dos Campos, o colexio Paio Gómez Charino e a liña infantil do entón CEIP Marcos da Portela.
A reivindicación do ensino público e a loita dun barrio pola cualidade educativa está detrás da celebración. A denuncia dos pais, profesores e a veciñanza do mal estado dos centros escolares do barrio e mais a esixencia dunha educación pública e de calidade merece o recoñecemento do traballo feito. A implicación de todos fixo posible dotar a Monte Porreiro dunha oferta educativa axeitada e con futuro, un paso máis na construción da identidade dun barrio que hoxe é modelo de convivencia.