Medos e fobias infantís na UNED
Por Oskar Viéitez
A avaliación e a intervención nos medos, fobias e terrores infantís será obxecto de análise para os profesionais da psicoloxía en Galicia entre o 1 e o 2 de marzo, nun curso monográfico que organiza o Colexio Oficial de Psicoloxía de Galicia e que se celebrará no Centro Asociado da UNED de Pontevedra.
Calcúlase que afectan a arredor dun 18% dos nenos e adolescentes
Baixo o título "Medos, fobias e terrores infantís", a psicóloga Raquel Espantoso San José, especializada en trastornos da infancia e da adolescencia, revisará as diferentes etapas á hora de abordar este tipo de trastornos, que se calcula que afectan a arredor dun 18% dos nenos e adolescentes.
Se ben tradicionalmente os problemas psicolóxicos de nenos e adolescentes se teñen asociado a problemas de comportamento e condutas disruptivas, os problemas de ansiedade son, pola contra, un dos principais motivos de consulta.
O fracaso escolar, a baixa autoestima, a soidade, os problemas no seo da familia, son algunhas das razóns para esta sintomatoloxía e os consecuentes problemas fóbicos, medos e outros trastornos asociados a ela.
A avaliación dos problemas de ansiedade na infancia e na adolescencia será, pois, un dos puntos a analizar no curso, así como as súas expresións sintomáticas, mentres que se exporán diversas formas de intervención terapéutica, tanto cos menores como cos seus pais e nais. Finalmente, reservarase un tempo para a exposición e o debate entre os profesionais asistentes sobre casos clínicos.