O Concello xa ten os terreos para reformar a PO-234 no treito de Cotobade
Por Redacción
Os terreos necesarios para afrontar a mellora da PO-234, no treito que pasa por Cotobade, xa son de propiedade municipal. Así o comunica o Concello de Cerdedo-Cotobade tras asinar todas as cesións de terreos cos propietarios afectados pola obra nesta estrada.
O Concello xa dispoñía do documento formal de cesión por parte da comunidade de montes de Augasantas, que era o principal afectado e que aprobou este acordo o pasado mes de xullo, e o presidente, Jorge Cubela, xa conseguira de palabra a consecución das parcelas privadas dende hai bastantes semanas.
Agora, grazas a colaboración da asociación de veciños e dos comuneiros de Augasantas, presididas por Lino Morales e Nicasio Rivas, xa se conta cos escritos formais de todos estes particulares afectados pola mellora integral desta estrada.
Cubela explicou que, malia a vontade dos veciños, este tipo de procesos de cesión de terreos "sempre son farragosos para acadar todos os escritos, porque non pode faltar ningún, pero xa temos toda a documentación".
Así, explicou que os terreos xa están oficialmente en posesión do Concello, que é un dos requisitos esixidos pola Xunta, xa que non se quería afrontar un longo proceso de expropiacións que adiaría a obra.
Segundo sinalou Cubela, esta documentación da posta a disposición das parcelas afectadas remitirase a vindeira semana á Consellería de Infraestruturas, que ten consignados máis de 600.000 euros nos seus orzamentos para acometer esta primeira fase no treito cotobadés de Augasantas.
Ademais, instou ao Concello de Ponte Caldelas a acometer con celeridade o mesmo proceso, "xa que hai un firme compromiso da Xunta de mellorar este vial canto antes en dúas fases".
Nesta liña, demandoulle a Andrés Díaz, "que faga exactamente o mesmo que Cotobade e chegue a un acordo cos veciños para a cesión gratuíta de terreos" e asegurou que tanto o seu executivo como todos os veciños "somos os máximos interesados en que se acometa toda a obra, aínda que sexa en dúas fases, porque para nós non é operativo que só se faga un treito, xa que non nos permite completar unha boa comunicación con Laxoso e Ponte Caldelas".
Relacionadas:
-
A PO-234, en obras o próximo verán polo tramo de Cotobade; Ponte Caldelas terá que esperar
Por Alejandro Espiño & Mónica Patxot |
-
O alcalde de Ponte Caldelas e a conselleira de Infraestruturas sentarán a falar da PO-234
Por Oskar Viéitez |
-
Ponte Caldelas invita á conselleira de Infraestruturas a "percorrer o perigoso trazado da PO-234"
Por Redacción |
-
Dous quilómetros de coches para pedir o arranxo integral da PO-234
Por Redacción |
-
VÍDEO.- Así de perigoso é circular pola PO-234 ao seu paso por Ponte Caldelas
Por Redacción |
-
Unha caravana de coches, novo acto de protesta para reclamar a mellora da PO-234
Por Redacción |
-
Os veciños de Laxoso e Aguasantas piden a "reforma da totalidade" e non por fases da PO-234
Por Redacción |