Con motivo da feira gourmet 'Etiqueta Negra' que se celebrará do 12 ao 14 de novembro no recinto feiral de Pontevedra, a Deputación Provincial organizará cinco obradoiros sobre o té galego que incluirán un procedente da Estación Fitopatolóxica de Areeiro para dar a coñecer as posibilidades produtivas e de mercado deste cultivo. 

Para poder facelo, a Deputación, a través da Estación Fitopatolóxica do Areeiro, instalará unha tetería na que o especialista en té Carlos Riaño impartirá sesións comentadas para que as persoas participantes poidan coñecer os diferentes tipos de té, a súa procedencia, propiedades e a forma correcta de preparalo.

Para participar nestas sesións establécese un máximo de 20 participantes en cada unha e será imprescindible inscribirse con antelación na propia tetería. 

Ademais, nos momentos nos que non se celebren os obradoiros, a tetería funcionará como expositor de información relacionada co té, co té galego e coas investigacións que sobre este cultivo se teñen realizado na Estación Fitopatolóxica.

A deputada delegada destas instalacións, Eva Vilaverde, explica que o té é moito máis descoñecido do que parece, de modo que o que se pretende é que profesionais da hostalaría e das tendas de té e o público xeral coñezan a forma correcta de preparalo e as súas particularidades. 

Os obradoiros serán o sábado 12 de novembro de 17.00 a 18.30 horas; o domingo 13 de 13.00 a 14.30 horas e de 17.00 a 18.30 horas; e  o luns 14 de novembro de 12.00 a 13.30 horas e de 16.15 a 17.45 horas.