Retiran 35.000 quilos de residuos dos fondos mariños de portos pontevedreses
Por Redacción
A Consellería do Mar retirou dos fondos mariños dos portos pontevedreses de Tragove (Cambados), Bueu, Portonovo, Sanxenxo, O Xufre (A Illa de Arousa) e A Guarda uns 35.000 quilos de residuos na terceira fase do Plan de limpeza de dársenas posto en marcha no ano 2013.
O proxecto deuse por rematado este mércores no porto de Tragove, de modo que visitou o recinto o presidente de Portos de Galicia en funcións, José Juan Durán. A limpeza das dársenas implica a recollida selectiva de residuos do fondo mariño dentro das augas interiores do porto e a limpeza en terra.
Entre os residuos que se acumulan nos fondos mariños, atópanse diversos obxectos de medianas e grandes dimensións, como restos de embarcacións, rodas das defensas dos peiraos, cadeas, cabos e elementos de tipo doméstico. Ademais, nas limpezas anteriores retiráronse restos da propia actividade portuaria que accidentalmente acaban no fondo do mar, como caixas de peixe ou cabos desprendidos de embarcacións atracadas no peirao.
A Consellería do Mar promove esta limpeza con carácter regular para mellorar a seguridade nas augas interiores e impulsar a protección da fauna mariña. Deste xeito refórzase a sustentabilidade ambiental dos peiraos de titularidade autonómica.
Nas fases anteriores do plan na provincia de Pontevedra foron recollidos preto de 10.000 quilos de residuos nos portos de Carril (Vilagarcía), Vilanova, O Grove, Arcade (Soutomaior) e Combarro.